Дьокуускай 2032 сылга диэри ураты куоратынан буолуохтаах. Бу туһунан 2022-2032 сылларга өрөспүүбүлүкэ киин куоратын социальнай-экэнэмиическэй сайдыытын бырайыагын көрөн баран Айсен Николаев бэлиэтээтэ.
Санатан эттэххэ, былырыын Айсен Николаев 2022-2032 сылларга Дьокуускай куорат социальнай-экэнэмиическэй сайдыытын быһаарар стратегическай докумуон бырайыагын оҥорорго дьаһайбыта. Сорудаҕы Ил Дархан норуот дьокутааттарыгар Анал этиитин кэмигэр иһитиннэрбитэ.
Бырайыакка миниистирдэр, муниципалитеттар бэрэстэбиитэллэрэ, уопсастыбанньыктар үлэлэстилэр. Докумуону Ил Дархаҥҥа СӨ экэниэмикэтин миниистирэ Майя Данилова билиһиннэрдэ. Кини куорат өрөспүүбүлүкэ устуоруйата, административнай, үп-харчы, үөрэх уонна билим киинин быһыытынан бигэ сайдыытын сүрүн тэрээһиннэрин ааттаата. Манна социальнай эбийиэктэри тутуу, өрөмүөн, дьиэлэри саҥардыы, саҥа үлэ миэстэтин таһаарыы, ол иһигэр IT-хайысха, о.д.а. киирэллэр.
Куорат сайдыытын 2032 сылга диэри хайдах көрөрүн, куорат баһылыгын эбээһинэһин толорооччу Евгений Григорьев иһитиннэрдэ. Кини Дьокуускай дьон олоруон баҕарар («человекоцентричным») куората хайдах буоларыгар хайысхалары ааттаталаата.
Айсен Николаев эрэгийиэн бырабыыталыстыбатын уонна куорат дьаһалтатын көрүүлэрин истэн баран, стратегическай докумуон бырайыагар бэйэтин этиилэрин киллэрдэ, бастатан туран, туохха болҕомто уурар эрэйиллэрин ыйда.
Ил Дархан этэринэн, бырайыакка тэрээһиннэр үчүгэйдик ыйыллыбыттар эрээри, уопсай кэнсиэпсийэтэ тиийбэт. “Куһаҕана суох былааны оҥорбуккут, оннооҕор куорат инвестицияҕа хас даҕаны сыллаах бырагырааматын киллэрбиккит. Докумуоҥҥа, биллэн турар, наадалаах социальнай эбийиэктэр тутууларын көрдөрбүккүт. Ол эрээри, маны бүгүҥҥү күнтэн аттарбыккыт. Хомойуох иһин, мин аны 10 сылынан куорат хайдах буолуохтааҕын туһунан уопсай өйдөбүлү көрбөтүм”, — диэн эттэ.
Айсен Николаев Дьокуускай куораты аны 10 сылынан баай хапытааллаах (богатый человеческий капитал) ураты куорат курдук ылыныахтаахтар диэн ыйар.
Өрөспүүбүлүкэ салалтата, бастатан туран, туохха болҕомто уурары ыйда. Олор кэккэлэригэр оскуолаларга уонна уһуйааннарга миэстэлэри тэрийии, билиҥҥитэ Дьокуускай куоракка баар элбэх кыбартыыралаах 1200 мас дьиэлэри көтүрүүнү ааттаталаата. Сыыппараҕа көһүүнү, уонунан тыһыынча киһи үлэлиир аччыгый биисинэһи, тырааныспар инфраструктуратын, харгыһа суох сылдьыыны сайыннарыыны эмиэ суолталаах диэн эттэ уонна олохтоох бородууксуйаны оҥорон таһаарыыга болҕомто ууралларыгар ыҥырда.
СӨ Ил Дарханын уонна Бырабыыталыстыбатын пресс-сулууспата.
Хаартыска: Андрей СОРОКИН (СИА).