Ил Дархан э.т. Айсен Николаев бэлиэтииринэн, Саха сиригэр Япония икки миниистирэ тэҥинэн кэлэн мунньахтаабыттара суох.
— Бүгүн Сахабыт сирин историятыгар бэлиэ күн буолла. Икки дойду парламеннарын икки ардыларыгар үлэлэһиигэ Японияттан улахан дэлэгээссийэ кэллэ. Биһиги дойдубутугар Японияттан бу маннык икки улахан судаарыстыбаннай деятеллэр кэлэллэрэ улахан суолталаах. Дэлэгээссийэ биһиги региоммутугар икки күн сылдьыаҕа. Бүгүн икки мунньах ыытылынна. Бастакы мунньахха Саха сиригэр үлэлии турар бырайыактары кэпсэттибит. Ону сэргэ медицина, таас чох промышленноһын боппуруостарын ырыттыбыт. “Умный город” диэн Япония ыытар бырайыагын олоххо киллэрии туһунан кэпсэтии ыыттыбыт. Бу чааһыгар цифровой эйгэни киллэриигэ үлэлэһиэхпит. Табылыннаҕына, Дьокуускай куорат Япония ыытар бырайыагар үһүс куоратынан киириэҕэ. Икки күн устата Япония дэлэгээссийэтигэр бэйэбит бырайыактарбытын билиһиннэриэхпит. Онон бүгүн икки миниистир Хиросигэ Сэко уонна Масадзи Мацуяма кэлбиттэрэ биһиэхэ улахан суолталаах, — диэн этэр Айсен Сергеевич.
Ыспыраапка: 2016 с. Япония премьер-миниистирэ Синдзо Абэ Сочига РФ президенигэр Владимир Путиҥҥа Япония уонна Россия бииргэ үлэлэһиилэригэр 8 пууннаах докумуону билиһиннэрэн турар. Бу былаанынан билигин үгүс бырайыак олоххо киирдэ. Быйыл ыам ыйыгар икки дойду лидердэрэ Японияҕа Россия, Россияҕа Япония сылларын биллэрэн тураллар.
Аграфена КУЗЬМИНА, “Саха сирэ” хаһыат, edersaas.ru.