Ил Дархан Айсен Николаев сэтинньи 2 күнүгэр Арассыыйа тыатын хаһаайыстыбатын миниистирэ Дмитрий Патрушевы көрсөн, «биир кэлим субсидия» кээмэйин тыа хаһаайыстыбатын бородууксуйатын оҥорууга уустук усулуобуйалаах территорияларга үрдэтэр наадатын туһунан кэпсэттэ.
edersaas.ru.
«Биир кэлим субсидияны» ааҕыыга туһаныллар, 41 эрэгийиэҥҥэ үрдэтиллэр коэффициент билиҥҥи кээмэйэ Уһук Хотугу сир уонна онно тэҥнэнэр территориялар уратыларын учуоттаабатын Айсен Николаев Саха Өрөспүүбүлүкэтин холобуругар быһааран биэрдэ. Киэҥ сиринэн тарҕанан олоруу, сылы эргиччи суол суоҕа, үлэ дьыл кэмиттэн тутулуктанара, тиэйии-таһыы тарыыбын үрдүгэ, ынах сүөһү кыстыгын уһуна барыта түмүллэн оттук-уматык, ыһыы сиэмэтин, уоҕурдуу, ас-үөл, племенной сүөһү, тыа хаһаайыстыбатын тиэхиньикэтин уонна тэрилин сыаналарын ыаратарын итиэннэ тыа хаһаайыстыбатын үлэтин-хамнаһын барыһын намтатарын бэлиэтээтэ.
Салгыы кэпсэтии салааны цифровизациялааһыҥҥа салалынна. Федеральнай миниистир «Цифровой тыа хаһаайыстыбата» бырайыагы ырытан оҥорууга Саха Өрөспүүбүлүкэтин пилотнай эрэгийиэн быһыытынан көрүөххэ сөбүгэр сөбүлэстэ. Көрсүһүүнү түмүктүүрүгэр Ил Дархан Саха сирин АПК-тын сайдыытын боппуруостарын миэстэҕэ дьүүллэһэргэ Дмитрий Патрушевы бу сыл бүтүүтэ Дьокуускайга кэлэ сылдьарга ыҥырда. Бу туһунан Ил Дархан уонна бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» edersaas.ru.