Айсен Николаев: «Дьаҥ арыый намтаата эрээри, уоскуйар билигин да эрдэ»

Бүгүн, от ыйын 3 күнүгэр, 12:00 чааска Саха сирин Ил Дархана Айсен Николаев өрөспүүбүлүкэҕэ коронавирус балаһыанньатын туһунан билиһиннэрдэ.  

edersaas.ru

Ил Дархан иһитиннэрбитинэн, дьаҥ туруоҕуттан Саха сиригэр барыта 4365 киһи коронавирус дьаҥар хаптарбыт. Бүтэһик хонукка, COVID-19 ыарыы 50 киһиэхэ көстүбүт. Айсен Николаев дьаҥ намтаан, билиҥҥитэ биир таһымҥа турарын эттэ. 

— 50 саҥа ыалдьыбыт дьонтон 41 киһи Дьокуускай куорат олхтооҕо,  3 киһи Мииринэй улууһугар, иккилии киһи Нерюнгри уонна Амма улуустарыгар сутуллубуттара билиннэ. 31 киһи ыарахан туруктаах, 8 киһи ИВЛ аппараатыгар холбонон сытар. 

Биһиэхэ от ыйын 2 күнүттэн, хааччахтаныы эрэсиимэ чэпчэтиллэн, атыы-эргиэн дьиэлэрэ, сайыҥҥы кафелар үлэлээн эрэллэр. Уу тырааныспарынан уонна улуустар икки ардыларыгар таксилар сырыылара саҕаланнылар. Онон сибээстээн, бэйэ икки ардыгар чугас алтыһыы, биллэн турар улаатта.

Биир дойдулаахтарбын мааска кэтэргитин, бэйэ икки ардыгар тэйиччи сылдьары тутуһаргытын кытаатан умнубаккытыгар көрдөһөбүн. Улуустар дьаһалталара, тэрилтэлэр салалталара, атыы-эргиэн үлэһиттэрэ Роспотребнадзор ирдэбиллэрэ билигин даҕаны толору тутуһуллуохтаахтарын умнумаҥ, — диэтэ.

Маны сэргэ, Ил Дархан оскуоланы бүтэрбит оҕолор биир кэлим эксээмэни туттаран саҕалаабыттарын эттэ. Тэрээһин былаан быһыытынан бара турарын, эксээмэн хамыыһыйатын чилиэннэриттэн уонна эксээмэннээх оҕолортон ким да туоратыллыбатаҕын, барыларын кыраадыстара мээрэйдэниллибиттэрин, барыта этэҥҥэтин иһитиннэрдэ. Айсен Сергеевич оҕолорго уонна төрөппүттэргэ ыарыыттан сэрэнэллэригэр, ол инниттэн бэйэни хааччахтаныы эрэсиимин кытаанахтык тутуһалларыгар соруйда.

“Эксээмэннэргитин этэҥҥэ туттарыҥ, ол туһуттан чөл доруобуйалаах сылдьыах тустааххыт. Бу кэнники туттарсаргытыгар улахан суолталаах буолуоҕа”, — диэтэ.

Салгыы балыыһалар үлэлиир эрэсиимнэригэр тохтоото. 

— Быйыл үөрэххэ туттарсарга быраабылалар лаппа уларыйдылар. Холобур, үөрэнээччилэртэн 086у ыспыраапка ирдэммэт. Хомойуох иһин, бу туһунан араас олоҕо суох сурахтар тарҕаналлар, ону итэҕэйимэҥ. Аны туран, балыыһалар, поликлиникалар үлэлэрин туһунан бэлиэтээтэххэ, дойду үрдүнэн эмп тэрилтэлэрэ былааннаах үлэҕэ өссө да киирэ иликтэр. Ити коронавирус эпидемиятыттан. Ол гынан баран, сотору кэминэн балаһыанньа уларыйыа диэн эрэнэбит, — диэн эттэ. 

Егор Карпов, «Саха сирэ» хаһыат, edersaas.ru