Ил Дархан Айсен Николаев 2019 сылы Сомоҕолоһуу сылынан биллэрдэ. Бу туһунан кини бүгүн Анал этиитигэр иһитиннэрдэ.
edersaas.ru
Суруналыыстары кытары көрсүһүүтүгэр чуолаан, тоҕо Сомоҕолоһуу сылын биллэрбитин маннык быһаарар. “Түмсүүбүт суох буоллаҕына, биһиги сайдыыбыт бытааран иһиэҕэ. Холобур, ылан көрүҥ, Өлүөнэ өрүһү туоруур муостабыт тутуутун. Муоста уу аннынан барар дуу, үөһэнэн барар дуу диэммит бэйэбит икки ардыбытыгар мөккүһэн бириэмэбитин онно бараан кэбистибит. Ити курдук бэйэ-бэйэбитин кытары уопсай биир тылы булбат буоллахпытына, сыалбытын-сорукпутун ситиһиэхпит суоҕа. Ол иһин, бастатан туран, сомоҕолоһуохпутун, биир санааҕа кэлиэхпитин наада. Оччоҕо эрэ кыайыылаах тахсыахпыт, туох баар боппуруостарга, инновация буоллун, айти-технология, тутуу буоллун барытыгар ситиһиилэниэхпит”, — диэн бэлиэтиир Айсен Сергеевич.
Аграфена КУЗЬМИНА, “Саха сирэ” хаһыат.