Айсен Николаев: «Чурапчы саҥа бырайыага тыа хаһаайыстыбатын ситимин төрдүттэн уларытар кыахтаах»
Ил Дархан Айсен Николаев Чурапчыга сырыытыгар улуус баһылыга Андрей Ноговицын аныгы технологияларга тирэҕирбит тыа хаһаайыстыбатын сайдыытын көҕүлүүр Ааҕыныстыбаны тэрийии бырайыагын билиһиннэрдэ.
«Саха сирэ» edersaas.ru
Бырайыак тыа хаһаайыстыбатын саҥа сокуонугар уонна кэлэр сылтан киллэриллэр өйөбүл саҥа ырычааҕа олохтоох салайыныы уорганнарыгар биэрэр боломуочуйаларыгар олоҕурар. Сүөһү-сылгы ахсаанын элбэтэн, эти-үүтү, оҕуруот аһын итиэннэ сир аһын соҕотуопкалааһыны кэҥэтэн, тыа хаһаайыстыбатын табаары оҥорор бөдөҥ хаһаайыстыбаларга эрэ буолбакка, дьоҕус бааһынай уонна кэтэх хаһаайыстыбалар дохуоттарын муҥутуур үрдэтэргэ туһуланар.
– Бу бырайыак тыа хаһаайыстыбатын ситимин төрдүттэн уларытар кыахтаах. Ааспыт өттүгэр өр сылларга тыа хаһаайыстыбата экэниэмикэ самалык салаатын курдук көрүллэр, сүрүннээн кини социальнай суолтата эрэ чорботуллубут буоллаҕына, билигин салааны сайыннарыыга үп-харчы, сокуон, информация өттүлэриттэн арыаллааһын, сыыппара технологиятын киллэрии эрэйиллэр. Андрей Тимофеевич бэйэтин хамаандатын кытары оҥорбут бырайыага тыа хаһаайыстыбатыгар эрэ буолбакка, тыа сирин кэлим сайыннарыыга улахан суолталаах, – диэтэ Айсен Николаев.
Түмүгэр Бырабыыталыстыбаҕа уонна тустаах биэдэмистибэлэргэ бу үчүгэй саҕалааһыны өйүүргэ сорудахтаата, бырайыак үчүгэй түмүктэри көрдөрдөҕүнэ, бүтүн өрөспүүбүлүкэҕэ тарҕатарга эттэ.
Надежда Нестерова, «Саха сирэ» edersaas.ru