Ил Дархан Айсен Николаев чааһынай тутуутун (ИЖС) боппуруостарын национальнай бырайыактары уонна бырагыраамалары сүрүннүүр суһал ыстаап мунньаҕар көтөхтө.
Дьон ордук тыа сиригэр чааһынай дьиэ туттар. Бу өрөспүүбүлүкэҕэ саҥа тутуллан киирэр дьиэни барытын аахтахха, уопсай иэнин кээмэйин аҥаарын ылар. 2022 сылга Саха сиригэр барыта 551 тыһ. кв. м олорор дьиэ тутуллуохтааҕыттан 233 тыһ. кв.м. чааһынай дьиэлэр ылаллар.
Ол иһин, Айсен Николаев этэринэн, чааһынай дьиэни туттууну бары өттүн көрөн, биир кэлимсэ быһаарыныы ылынар ирдэнэр. Бу быһарыныы баан уонна транспорт тиһигин бииргэ тутан, дьиэ туттарга анаммыт сир учаастактарын баалларын-суохтарын көрөн, сөптөөх тутуу матырыйаалларын хааччыллыыны уонна сыананы учуоттаан барытын хабыахтаах.
«Бүгүҥҥэ күҥҥэ саамай инники тирээн турар боппуруоспут – тутуу матырыйаалларын сыаната үрдээһинэ. Чэпчэки сыаналаах уонна ырыынагы хааччыйар тутуу матырыйааллары оҥорор олохтоох хампаанньалары хайдах өйүүрбүтүн толкуйдуох тустаахпыт», — диэтэ Айсен Николаев.
Ол курдук, холобура, Massiv-Holz-Mauer истиэнэ панеллэрин таһаарар хампаанньалар ырыынакка быйылгы былааннанар кээмэйи барытын оҥорорго бэлэмнэр.
Дьокуускайга «Комплексные решения ИЖС» диэн муниципальнай инвестициялыыр бырайыак үлэлиир. Бырайыагынан 2023 с. диэри барыта 30 2700 кв. м. иэннээх чааһынай дьиэ тутуллуохтаах.
Өрөспүүбүлүкэҕэ олохтоох бэйэни салайыныыларга субсидия быһыытынан чааһынай дьиэ туттар дьоҥҥо инженернай инфраструктура тардылларыгар анаан харчы көрүллэр. 2022-2023 сс. бу манна барыта 190 мөл көрүллүбүт, 10 муниципальнай тэриллиигэ куонкурус быһыытынан тыырыллыбыт. 885 элбэх оҕолоох ыаллар учаастактарын инфраструктуранан хааччыйыахтара.
Суһал ыстаабы түмүктүүрүгэр, Айсен Николаев чааһынай дьиэ тутуутугар төһө тутуу маһа наадатын быһаарарга, онно үлэһэргэ Бырамыысыланнас уонна геология министиэристибэтигэр сорудах биэрдэ.
СӨ Ил Дарханын уонна Бырабыыталыстыбатын Пресс-сулууспата
СИА хаартыската