Айсен Николаев бырабыыталыстыба тутулун бигэргэттэ

Ааптар: 
Бөлөххө киир:

Ил Дархан Айсен Николаев өрөспүүбүлүкэ судаарыстыбаннай ситэриилээх былааһын тутулун туһунан ыйаахха бэҕэһээ илии баттаата.

edersaas.ru.

Ыйаах быһыытынан, Архитектура уонна тутуу комплексын министиэристибэтэ Тутуу министиэристибэтигэр, Ыччат дьыалатын уонна дьиэ кэргэн бэлиитикэтин министиэристибэтэ Ыччат дьыалатын уонна социальнай коммуникациялар министиэристибэлэригэр, Спорт министиэристибэтэ Физическэй култуура уонна спорт министиэристибэтигэр уларытылыннылар. Ыччат дьыалатын уонна социальнай коммуникациялар министиэристибэлэригэр Экономика министиэристибэтин гражданскай көҕүлээһиннэри сайыннарыыга уонна социальнай хайысхалаах кэммиэрчэскэйэ суох тэрилтэлэри өйөөһүҥҥэ боломуочуйата бэрилиннэ. Ыччат дьыалатын уонна дьиэ кэргэн бэлиитикэтин министиэристибэтин дьиэ кэргэн уонна демография судаарыстыбаннай бэлиитикэтин олоххо киллэриигэ эбээһинэһэ Үлэ уонна социальнай сайдыы министиэристибэтигэр бэрилиннэ, оттон чөл олоххо туһаайыллар үлэ Физическэй култуура уонна спорт министиэристибэтигэр сүктэрилиннэ.

Бырабыытыластыба састаабыгар Ил Дархан иһинэн Архитектура уонна градостроительство управлениета тэриллэр, киниэхэ Архитектура уонна тутуу комплексын министиэристибэтиттэн архитектура, градостроительство эйгэтинэн үлэ сыһыарыллар. Бу уларытыыларга Айсен Николаев эрдэ эппитин курдук, бырабыыталыстыба үлэһиттэрин ахсаана эбиллибэт – саҥа управление толоруулаах былаас атын салааларыттан сарбыллыбыт штаттарынан тэриллэр. Ил Дархан уонна бырабыыталыстыба дьыалаларын управлениета публичнай дьаһаллары тэрийэр туһунан иһитиннэриилэри көрүүгэ уонна сөбүлэһиннэриигэ боломуочуйалаах уорган буолар.

Онон, Саха Өрөспүүбүлүкэтин толоруулаах судаарыстыбаннай былааһын саҥа тутулугар бырабыыталыстыба маннык састаабынан тэрилиннэ: бырабыыталыстыба бэрэссэдээтэлэ, бырабыыталыстыба бэрэссээдээтэлин икки бастакы солбуйааччы, үс вице-премьер, уон аҕыс министиэристибэ, түөрт Судаарыстыбанай кэмитиэт, РФ Бэрэсидиэнигэр уонна Уһук Илин федеральнай уокурукка өрөспүүбүлүкэ бастайааннай бэрэстэбиитэлистибэлэрэ, Бэтэринээрийэ департамена, Култуура нэһилиэстибэтин эбийиэктэрин харыстабылын департамена, Ил Дархан иһинэн Архитектура, градостроительство уонна тутуу надзорун управлениета, Ил Дархан уонна бырабыыталыстыба дьыаларынан управлениета, бырабыыталыстыба иһинэн ГТАС управлениета, Мөрөбүөй судьуйалар үлэлэрин хааччыйыы тэрээһинигэр киин аппараат. Судаарыстыбаннай былаас толоруулаах уорганын үлэһиттэрин ахсаана уларытыллыбата. Бу туһунан Ил Дархан уонна бырабыыталыстыба пресс-сулууспата иһитиннэрдэ.

Раиса Сибирякова, «Саха сирэ» edersaas.ru.

+1
0
+1
0
+1
0
+1
0
+1
0
+1
0
+1
0