Айсен Николаев Былатыан Ойуунускай пааматынньыгар сибэкки дьөрбөтүн уурда
Бүгүн, муус устар 27 күнүгэр, өрөспүүбүлүкэбит тэриллибитэ 100 сылыгар Ил Дархан Айсен Николаев судаарыстыбаннай уонна бэлитиичэскэй диэйэтэл Былатыан Ойуунускай пааматынньыгар сибэкки дьөрбөтүн уурда.
«Бүгүн биһиги өрөспүүбүлүкэбит улахан бырааһынньыга. 100 сыллааҕыта Саха автономията төрүттэммитэ. Биллэн турар, бу күҥҥэ ону туруулаһааччылары саныахтаахпыт. Ол дьонтон биирдэстэринэн Былатыан Ойуунускай буолар. Кини автономия баар буоларын, саха норуота үөрэхтээх буоларын, култуура сайдарын туһугар бэйэтин талаанын уурбута. Платон Алексеевич 95 сыллааҕыта суруйбут «Сүүс сыллааҕы улуу былаан» айымньытыгар хоһуйбут олоҕугар эһигини кытта тэҥҥэ үлэлии сылдьарбыттан олус үөрэбин. Биһиги бииргэ инникибитин көрүөхтээхпит, ыраланыахтаахпыт, айыахха-тутуохха, оччотугар кэнэҕэски ыччаппыт биһигинэн киэн туттуо», — диэн Айсен Николаев эттэ.
Үөрүүлээх тэрээһиҥҥэ судаарыстыбаннай сүбэһит Андрей Борисов, Ил Түмэн бэрэссэдээтэлин бастакы солбуйааччы Александр Жирков, бырабыыталыстыба чилиэннэрэ, норуот дьокутааттара, судаарыстыбаннай былаас уорганнарын бэрэстэбиитэллэрэ уонна салайааччылара, уопсастыбаннас, ыччат кыттыыны ыллылар.
СИА хаартыскалара.