Айсен Николаев: былаас уорганнарын салайааччылара хоруупсуйаны утары тиһиктээхтик үлэлиэхтээхтэр
Судаарыстыбаннай былаас уонна олохтоох салайыныы уорганнара хоруупсуйаны уонна атын быраабы кэһиилэри сэрэтиигэ үлэлэрэ көдьүүстээх буолуохтаах. Бу туһунан Саха сирин Ил Дархана Айсен Николаев салайан ыыппыт СӨ хоруупсуйаны утары үлэни сүрүннүүр хамыыһыйа мунньаҕар этилиннэ.
Дуоһунастаах сирэйдэр дохуоттарын уонна ороскуоттарын, баайдарын-дуолларын уонна баайга-дуолга сыһыаннаах эбэһээтэлистибэлэригэр ыспыраапкалары анаалыстааһыҥҥа уонна бэрэбиэркэлээһиҥҥэ ээл-дээл сыһыаннаһар табыллыбат. Хас биирдии биллибит чахчынан федеральнай сокуоҥҥа олоҕуран бэрэбиэркэни ыытыахтаахтар. Ону сэргэ былаас уорганнара судаарыстыбаннай гражданскай уонна муниципальнай сулууспаларга дуоһунастарга үлэлиэн баҕалаахтары туһааннаах бэрэбиэркэнэн хааччыйыахтаахтар.
“Судаарыстыбаннай былаас уонна олохтоох салайыныы уорганнарын бары салайааччылара хоруупсуйаҕа сыһыаннаах кэһиилэри булууга уонна аччатыыга тиһиктээхтик үлэлиэхтээхтэр”, — диэтэ өрөспүүбүлүкэ баһылыга.
Айсен Николаев бэлиэтииринэн, хоруупсуйаны утары үлэ үпкэ-харчыга биэдэмистибэ иһигэр хонтуруолу уонна аудиты ыытыыны былаас бары уорганнарыгар сөптөөхтүк тэрийдэххэ эрэ кыаллар, ол иһигэр национальнай бырайыактары уонна федеральнай бырагыраамалары олоххо киллэрээччилэри.
Эрэгийиэн салайааччыта СӨ Ил Дарханын уонна СӨ Бырабыыталыстыбатын Дьаһалтатыгар, Олохтоох салайыныы департаменыгар СӨ Ил Дарханын иһинэн Хоруупсуйаны уонна атын быраабы кэһиилэри сэрэтиигэ управлениетын кытта муниципальнай оройуоннарга уонна куораттааҕы уокуруктарга хоруупсуйаны утары сокуоннаһы толорууну ырыталларыгар, чуолаан, олохтоох салайыныы уорганнарынан уонна итилэр дуоһунастаах сирэйдэринэн хоруупсуйаны утары миэрэлэри ылыыга боломуочуйалары толорууларын хонтуруоллуулларыгар соруйда.
Өрөспүүбүлүкэ баһылыга муниципальнай оройуоннар уонна куораттааҕы уокуруктар баһылыктарын хоруупсуйаны бохсууга үлэлэрин, хоруупсуйаны утары үлэ сокуоннаһын эйгэтигэр тахсыбыт кэһиилэр тустарынан отчуоту СӨ муниципальнай тэриллиилэрин – муниципалитеттар икки ардыларынааҕы бииргэ үлэлээһиҥҥэ ассоциациятыгар истэллэригэр этии киллэрдэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан