СӨ Ил Дархана Айсен Николаев бүгүн Хаҥалас улууһугар Өктөмҥө киирии суол өрөмүөнүн көрдө.
edersaas.ru
Суолга туох үлэ, тэрээһин ыытыллыбытын СӨ Бырабыыталыстыбатын бэрэссэдээтэлин бастакы солбуйааччыта Алексей Колодезников, СӨ тыраанспарын уонна суол хаһаайыстыбатын миниистирэ Владимир Сивцев уонна «Автодор» АУо генеральнай дириэктэрэ Ариан Сидоров кэпсээтилэр.
Бу эбийиэк “Тыа сирин бүттүүн сайдыыта” судаарыстыбаннай бырагыраама чэрчитинэн оҥоһулунна. «Умнас» өрөспүүбүлүкэтээҕи массыына суолуттан Өктөм сэлиэнньэтигэр диэри 9,69 км. Бу кэрчик өрөмүөнэ толору бүттэ. Суолга саҥа асфальтобетоннай кутууну түһэрдилэр, тротуар оҥордулар, уот ситимин тартылар.
Үлэ бэдэрээтчитэ – «Автодор» АУо.
Алексей Колодезников эппитинэн, 2020 сылга “Тыа сирин бүттүүн сайдыыта” судаарыстыбаннай бырагыраама чэрчитинэн өрөспүүбүлүкэҕэ уопсайа түөрт социальнай суолталаах суол тутулла турар эбит. Бу эбийиэктэр уопсай бүддьүөттэрэ 488,3 мөлүйүөн солкуобай, ол иһигэр дойду бүддьүөтүттэн 387,2 мөлүйүөн солкуобай көрүлүннэ.
Ону таһынан, бастакы солбуйааччы өрөспүүбүлүкэ Ил Дарханыгар «Куттала суох уонна хаачыстыбалаах суоллар» национальнай бырайыагынан өрөмүөннэнэ уонна тутулла турар эрэгийиэн суолларын эмиэ кэпсээтэ.
Айсен Николаев эппитинэн, быйыл хаһааҥҥытааҕар да элбэх суол оҥоһуллубут:
— Сыыспат буоллахпына, өрөспүүбүлүкэ устуоруйатыгар бу биһиги саамай үчүгэй көрдөрүүбүт буолар. Быйыл улуус, өрөспүүбүлүкэ, дойду суолталаах суоллара хаһааҥҥытааҕар да элбэх оҥоһулунна. Уопсайа, өрөспүүбүлүкэҕэ 500-тэн тахса килэмиэтир суол оҥоһуллубут. Кэлэр сылга эмиэ улахан соруктар тураллар. Тоҕо диэтэр, суол тыа сиригэр, уопсайынан, киһи олоҕор улахан оруоллаах, – диэн Ил Дархан түмүктээтэ.
edersaas.ru