Айсен Николаев: «Быйыл 14 оҕо саадын тутан киллэрдибит, ити туспа рекорд буолар»
Сэтинньи 16 күнүгэр Нам улууһун Кириэс-Кытыл сэлиэнньэтигэр 240 миэстэлээх “Тускул” оҕо саадын саҥа дьиэтэ аһылынна. Онно “Сарыал”, “Кытылчаан” бөлөхтөр көһөн киириэхтэрэ. Саҥа таас дьиэ тутуллан, Хамаҕатта нэһилиэгэр оҕо саадыгар миэстэнэн хааччыйыы кыһалҕата суох буолла.
Бу эбийиэги “Демография” национальнай бырайыак «Содействие занятости женщин – создание условий дошкольного образования для детей в возрасте до трёх лет» федеральнай бырайыагынан туттулар. Барыта 383,2 мөлүйүөн солкуобай суумалаах, ол үгүс чааһа федеральнай бүддьүөттэн үбүлэннэ.
Оҕо саадын аһыллыытыгар өрөспүүбүлүкэ Аҕа баһылыга Айсен Николаев эҕэрдэлии кэллэ. Кини цифровой лабораторияны ыларга сэртипикээти бэлэхтээтэ.
— Ыарахан да дьылларга өрөспүүбүлүкэбит үөрэҕирии эйгэтигэр саҥа эбийиэктэри тутар этэ. Быйыл 14 оҕо саадын тутан киллэрдибит, ити туспа рекорд буолар. САССР 100 сылын туолуутугар Максим Аммосов төрөөбүт дойдута бэртээхэй бэлэҕи тутта. Балтараа сыл эрэ устата дьиэ үрдүк хаачыстыбалаахтык тутулунна. “Прогресс” хампаанньаҕа, тутааччыларга махтанабын, — диэн кини эттэ.
“Тускул” оҕо саадын сэбиэдиссэйэ Саргылаана Индеева эппитинэн, олохтоохтор бары саҥа дьиэни олус күүппүттэрэ. Урут оҕолор эргэ, хаарбах, мас дьиэлэргэ сылдьыбыттара.
— Тутуу 2020 сыл бэс ыйыгар саҕаламмыта. 2021 сыл бүтэһигэр диэри тутан бүтэриэхпит диэбиттэрэ, ол тылларын толордулар. Бүгүн биһиэхэ олус үөрүүлээх күн. Нэһилиэк олохтоохторо бары бу күнү олус күүппүппүт. Сэлиэнньэлэргэ оҕо саадтара уонна оскуолалар тутуллар буоллахтарына, тыа сирэ сайдар кыахтаах, — диэн кини бэлиэтээтэ.
Дьиэ үс этээстээх. Манна оҕону сайыннарарга бары усулуобуйа баар: музыкальнай, спортивнай саалалар, мэдиссиинэ кэбиниэтэ, көмпүүтэр кылааһа, логопед, психолог кэбиниэттэрэ, астыыр сыах. Тиэргэҥҥэ күүлэйдиир уонна спортивнай былаһааккалар бааллар. Тутааччылар видеонан кэтээн көрүүнү, харабыллыыр уонна баһаарынай сигнализациялары туруорбуттар.
Оҕо саада докумуоннарын силигэ ситтэҕинэ, кэлэр үөрэх дьылыттан оҕолорго аанын тэлэччи арыйыаҕа. Манна кыра, орто саастаах уонна обургу оҕолорго 12 бөлөх баар буолуоҕа. Ону тэҥэ, дьааһыла бөлөхтөрө үлэлиэхтэрэ. Онон ийэлэр кыра саастаах оҕолорун дьааһылаҕа сырытыннаран баран, үлэҕэ тахсар кыахтаныахтара.
Ангелина Васильева, “Саха сирэ” хаһыат, edersaas.ru