Айсен Николаев: «Быһыы — дьаҥы бохсууга саамай көдьүүстээх ньыма»

Ааптар: 
Бөлөххө киир:

Бүгүн, ыам ыйын 17 күнүгэр, Саха сирин Ил Дархана Айсен Николаев өрөспүүбүлүкэтээҕи суһал ыстаап мунньаҕын ыытта. Бу туһунан пресс-сэкирэтээрэ Афанасий Ноев иһитиннэрэр.

Ил Дархан чугаһынан кэмҥэ турар сүрүн соругу ыйда — Саха сирин олохтоохторугар маассабай вакцинацияны ыытыы. Айсен Николаев бэлиэтииринэн, кылгас кэм иһигэр вакцинацияны ыытыы эпидбалаһыанньаны тупсарыаҕа. Итиэннэ кини вице-премьер Ольга Балабкинаҕа Дьокуускайга уонна Мэҥэ Хаҥаласка буола турар быһыыны-майгыны күн аайы сырдатар брифинин ыытарыгар сорудахтаата.

Ольга Балабкина иһитиннэрбитинэн, өрөбүллэргэ Мэҥэ Хаҥаласка тэрилтэлэри бэрэбиэркэлээбиттэр. Манна хааччахтыыр миэрэлэри кэспиттэргэ административнай ыстарааптар суруллубуттар. Ольга Валерьевна Аллараа Бэстээххэ уонна Майаҕа уулуссаҕа дьон сырыыта аҕыйаабытын бэлиэтээн эттэ.

Бэҕэһээ Дьокуускайга 834 киһи коронвирус утары быһыыны ылбыт. Билигин быһыыны биэрэр эбии пууннар арыллалларыгар, мобильнай биригээдэлэр тэриллэллэригэр үлэ барар.

«Суптник V» вакцина хат, ийэ буолбут дьахталларга уонна аллергиялаах дьоҥҥо бэриллибэтин эттилэр. Мантан атын олохтоохтор, ол иһигэр номнуо ыалдьан үтүөрбүттэр эмиэ бу вакцинаны ылыахтарын сөп.

СӨ сүрүн санитарнай бырааһа Маргарита Игнатьева аҕыс оройуоҥҥа ааспыт нэдиэлэтээҕэр сутуллуу элбээбитигэр болҕомтотун уурда. Вирус ыалдьыы эрдэ бэлиэтэммэтэх улуустарыгар — Аллайыахаҕа, Өлөөҥҥө уонна Үөһээ Бүлүүгэ бэлиэтэммит. Оттон 16 оройуоҥҥа ыарыы аҕыйаабытын, ол иһигэр Мэҥэ Хаҥаласка эмиэ аҕыйаабытын туһунан эттэ.

Мунньах бүтүүтэ Ил Дархан быһыы дьаҥы бохсууга самаай көдьүүстээх ньыма буоларын бэлиэтээтэ. Итиэннэ вакцина эбии хаһан кэлэрин чуолкайдыырга, вакцинаны ылбыт олохтоохтору учуоттуурга сорудахтаата.

  Ил Дархан уонна Бырабыыталыстыба пресс-сулууспата.

Андрей Сорокин хаартыската.

+1
0
+1
0
+1
0
+1
0
+1
0
+1
0
+1
0