Бүгүн өрөспүүбүлүкэ Ил Дархана Айсен Николаев “Быһаччы эфиргэ” кытынна. Экэниэмикэ боппуруостарыгар тохтууругар кини омук табаарын солбуйууга ылыныллар миэрэлэргэ тохтоото.
Тас дойдулар сааҥсыйаларыттан сылтаан үөскээбит балаһыанньаҕа дойдубут кэккэ хайысхаларга, салааларга түргэнник уларыйарга кыһанарын бэлиэтээтэ. «Биһиэхэ Арассыыйаҕа урут 90-с сылларга оҥоһуллубут сөмөлүөттэри тоҕо маассабайдык оҥоруо суохтаахпытый?, — диэтэ.
Айсен Сергеевич бары хайысхаларга түргэнник дьаһанан эрэллэриттэн үөрэрин эттэ.
— Билигин миэстэтигэр тугу оҥорон таһаарыахтаахпытый диэн толкуйдуохтаахпыт. Сорох арҕааҥҥы хампаанньалар барыталаан эрэллэринэн, төттөрүтүн атын кыахтар арыллаллар, — диэн салгыы бэлиэтээтэ.
Көрөөччү Ленин проспега хаһан аһылларын туһунан туоһулаһыытыгар хоруйдууругар өрөспүүбүлүкэ баһылыга Ленин проспега – бу Дьокуускайга эрэ буолбакка, өрөспүүбүлүкэҕэ саамай тутаах уулуссата буоларын бэлиэтээтэ. Ленин проспега 2023 сыл күһүнүгэр толору оҥоһуллан бүтүө диэн эрэннэрдэ. Бу киһи көрөөт хараҕа үөрэр сиринэн буолуохтаах. Ол да буоллар, куорат былааһа дьон сылдьарыгар, айанныырыгар эрэйэ суох буоларын хааччыйарга кыһаныахтаахтарын санатта.
Сарсын Уһук Илиҥҥэ боломуочуйалаах бэрэстэбиитэл Юрий Трутнев кэлэринэн сибээстээх ыйытыыга тохтоото. Кини Юрий Трутнев көмөтүнэн Уһук Илин эрэгийиэннэрэ куруук туһаналларын бэлиэтээтэ. Хотугу таһаҕаһы тиэйиигэ мунньах буолара күүтүллэр. Юрий Трутнев хас биирдии эрэгийиэҥҥэ сыһыаннаах боппуруостары тус-туспа көрөрүн туһунан эттэ. Чуолаан, Уһук Илиҥҥэ үлэлиир инвестордары кытта үлэлэһиигэ.
“Маасканы устарга тиэтэйбэт ордук”
Хамсык боппуруоһугар тохтоон, Айсен Николаев хааччахтааһыннар сыыйа уһуллан эрэллэрин эттэ. Ол эрээри РФ доруобуйа харыстабылын миниистирэ Мурашко харыстанар маасканы устарга тиэтэйбэппитигэр сүбэлээбитин санатта. Ону тэҥэ сорох эрэгийиэннэргэ дьаҥ үрдээһинэ бэлиэтэммит.
Бэлэмнээтэ Женни Стрюкова