Бүгүн, от ыйын 2 күнүгэр, 17:30 чаастан Ил Дархан Айсен Николаев социальнай ситимнэр көмөлөрүнэн быһа эпииргэ тахсан, олохтоохтор ыйытыыларыгар хоруйдаата.
Учуутал бульвара
Дьокуускайга Учуутал бульварыгар сыһыаннаах ыйытыы киирдэ. «Учуутал бульварын тупсаҕай гына оҥоруу барыаҕа. Санатар буоллахха, бульвар куорат дьаһалтатын көрүүтүгэр бэриллибитэ. Кэлэр сылга тустаах үлэ ыытыллыаҕа диэн эрэнэбин. Итиннэ умайбыт уонна эргэ дьиэлэр турбуттара. Бульвар оҥоһуллубута саамай сөп. Ол эрээри, ону тиһэҕэр тиэрдэр курдук үчүгэйдик оҥоруохха наада. Атын муниципалитеттарга да көрдөххө, кырасыабай миэстэлээх сирдэр-уоттар көрүүтэ суох тураллара баар суол. Итинник сирдэри-уоттары көрөр-истэр муниципалитеттар эбээһинэстэрэ буолар», — диэн Айсен Сергеевич хоруйдаата.
Суолу оҥоруу
Дьокуускай куорат олохтоохторо, биллэн турар, Намныыр суол куорат аттынааҕы учаастага хаһан өрөмүөннэнэн бүтэрин ыйыттылар. Ил Дархан Марха бөһүөлэгиттэн авиапорка диэри суолу кэҥэтии чугастаа5ы сылларга түмүктэниэҕэ диэн быһаарда. Быйыл балаҕан ыйыгар диэри Тулагыттан Объездной трассаҕа диэри өрөмүөн үлэтэ үмүрүйүөҕэ. «Биллэн турар, өрөмүөн үлэтэ салгыы барыаҕа. Авиапортан Жатай туһаайыытын диэки ол эбэтэр авиапорт уонна Марха икки ардыгар баар учаастагы кэҥэтии икки сыл иһинэр түмүктэниэҕэ. Бу туһунан куорат мээрэ Евгение Григорьевтыын быһаарсыбытым. Онон ити учаастактарга ыытыллар үлэлэр 2024 сылга диэри үмүрүйүөхтэрэ», — диэтэ Айсен Сергеевич.
Саха сирэ көмөлөһөр
Олохтоохтор Ил Дархан бу ааһан эрэр нэдиэлэҕэ Донецкайга баран кэлбитин туһунан ыйыттылар. «Донецкай олохтоохторо аҕыс сыл устата хайдах курдук ыарахан балаһыанньаҕа олорбуттарын туһунан аһаҕастык кэпсээтилэр. Онон сөптөөх анал байыаннай эпэрээссийэ бара турар. Олохтоохтор Арассыыйаҕа олус махтаналларын эттилэр. Саха сирэ, төһө кыалларынан, көмөлөһүөҕэ. Социальнай хабааннаах эбийиэктэри чөлүгэр түһэриигэ ылсан эрэбит. Саха сириттэн анал бөлөх тиийэн үлэлии сылдьар. Түгэнинэн туһанан, гуманитарнай көмөнү оҥоро сылдьар биир дойулаахтарбар ис сүрэхпиттэн махтанабын. Баҕа өттүнэн көмөлөһөр санаалаахтар элбэхтэр.
Айыы кыһатыгар үөрэнии
Быһа эпиир кэмигэр 203-с микрооройуон олохтоохторо бырапыыскалаах оҕолор Айыы кыһатыгар үөрэнэр кыахтара суоҕун туһунан этиннилэр. «Айыы Кыһата Саха сирин үрдүнэн биир бастыҥ оскуолабыт буолар. Тутуу барарыгар бары сөбүлэспиттэрэ. Билигин төрөппүттэр оҕолорун бу оскуолаҕа үөрэттэрэ биэрэр кыахтара суоҕа биллэр. Куорат дьаһалтата сөптөөх быһаарыныыны ылыныа диэн эрэнэбин. Ол эрээри, бу боппуруоһу наһаа үлүннэрэр наадата суох. Соторутаа5ыга диэри итиннэ оскуола суоҕа. Билигин баар кыһалҕа быһаарыллыаҕа», — диэн Айсен Николаев эппиэттээтэ.
Салгыы билиһиннэрэр буоллахха, «Өлүөнэ өрүскэ паруомнар төгүрүк суукканы тохтоло суох сылдьыахтара дуо?», — диэн ыйытыыга Айсен Сергеевич «Билигин паруомнар төгүрүк суукка кэриэтэ тохтоло суох үлэлииллэр. Биллэн турар, сырыы элбэҕиттэн сылтаан билигин да уочараттар үөскүүллэр. Ону суох оҥорууга сөптөөх болҕомто ууруллуоҕа», — диэн быһаарда.
«Быйыл БКЭ-ҕэ 100-түү баалы ылбыт оҕолорго 100-түү тыһ. солк көрүллүбүтэ. Эһиил баар буолуо дуо?», — диэн ыйытыыга «Эһиил ону көрүөхпүт, дьиҥэр,бу сөптөөх көмө, идиэйэ буолар. Талааннаах, дьоҕурдаах оҕолору өйүөх тустаахпыт», — диэн Айсен Сергеевич хоруйдаата.