Айсен Николаев быһа эпииргэ дьон ыйытыыларыгар хоруйдаата: коронавирус, ойуур баһаара, суол тутуута

Бүгүн, от ыйын 2 күнүгэр, Ил Дархан Айсен Николаев 20.30 чаастан социальнай ситимнэртэн быһа эпииргэ тахсан нэһилиэнньэни кытта кэпсэттэ.

Биллэн турар, кэпсэтии саҕаланыытыгар хамсык кыһалҕатыттан саҕаланна. Ил Дархан бүгүҥҥү туругу “ыарахан эрээри, муус устарга саҕаламмыт долгун арыый уҕараан турар” диэн сыаналаата. “Бу долгун чыпчаалыгар күн аайы 120-чэ киһи ыалдьар эбит буоллаҕына, билигин күннэтэ 100 иһинэн сутуллуу түгэнэ чахчыланар. Бу улахан сыыппара эрээри, үлэ түмүгэ көстөр, өссө даҕаны кыччата сатыахпыт, бу бүгүн күннээҕи сүрүн сыалбыт”. Хамсык билиҥҥи долгуна уларыйбытын бэлиэтээн эттэ – эдэр дьон ыалдьара үксээбит, ыарыы олус ыараханнык ааһар буолбут. “Бэйэни быыһанар, тулалыыр дьону харыстыыр биир ньыма баар – быһыыны ылыы”, — диир Ил Дархан. “Бэйэҥ вакцинаны ылбытыҥ дуо, ханныгы?” диэн ыйытыыга Айсен Николаевич “Спутник V” вакцинаны быһа эпииргэ ылбытын туһунан санатан эттэ. “Вакцина кэнниттэн ыалдьыбыт дьон ахсаана өрөспүүбүлүкэҕэ 400-чэ киһи. Кинилэр бары ыарыыны быдан чэпчэкитик уйуналлара көстөр. Мин бииргэ төрөөбүт быраатым вакциналанан баран ыалдьыбыта, бэрт чэпчэкитик аһарбыта. Уонна ким эрэ вакцина кэнниттэн өлбүтүн туһунан сымыйа – Саха сиригэр вакциналаммыт киһи өлбүт түгэнэ бүгүн күҥҥэ суох!”

Элбэх ыйытыы көҥүл өттүнэн вакциналааһын уонна вакцинаны ылбатах дьону үлэлииллэригэр хааччах туһунан киирдэ. “Кими даҕаны күүс өттүнэн прививканан быһар көҥүллэммэт эрээри, үлэ биэрээччи үлэһити сокуон быһыытынан үлэтиттэн тохтотор бырааптаах, бу барыта Арассыыйа сокуонугар сөп түбэһэр” диэн хоруй бэрилиннэ.

Ыарыыттан атын ордук элбэх ыйытыылар ойуур баһаардарын уонна кураан содулларыгар сыһыаннаах буоллулар. “Искусственнай ардаҕы тоҕо түһэрбэттэрий?” диэн ыйытыыга Айсен Николеав маннык хоруй биэрдэ: “Бу күннэргэ Ан-26 «Циклон» көмөтүнэн Үөһээ Бүлүү, Сунтаар, Ньурба уонна Мииринэй үрдүнэн ардах түһэрин күһэйдилэр. Бу ньыманы өссө даҕаны туһаныахпыт, ол эрэн ардаҕы күүһүнэн түһэрэргэ саатар былыттар баар буолуохтаахтар. Быйыл бэс ыйыгар 19 үйэттэн ыытыллыбыт халлааны кэтээһин сводкаларынан муҥутуур куйаас ый буолбут. Быйыл эмиэ өҥүрүк куйаас бүрүүкээтэ. Бу күҥҥэ былырыын умуруоруллубут баһаардар иэннэриттэн элбэх сири уоттан өрүһүйдүбүт. Ол аата үлэни оҥорорго, кэтээһини ыытарга ордук сатабыллаахтык дьаһанар буолбуппут”. Билигин уоту утары үлэҕэ 500-тэн тахса киһи федеральнай резервэттэн кэлэн үлэлии сылдьаллар. Уопсайа 2500 киһи ойуур баһаарын утары охсуһа сылдьар, 150 тиэхиньикэ туһанылла сылдьар. Өрөспүүбүлүкэ баһылыга федеральнай киин өйөбүлэ ордук күүстээҕин бэлиэтээн эттэ.

Суол тутуута, оҕо уһуйааннарын үлэтэ, куорат көрүҥүн өрө тардыы, балыыһалар кыһалҕалара, тыа хаһаайыстыбатын өйөбүл, онлайн күрэхтэһиилэр уонна да атын тыҥааһыннаах ыйытыылары кэпсэтии кыттыылаахтара көхтөөхтүк биэрдилэр, биир чаас иһигэр Ил Дархан сүрүн ыйытыыларга хоруйдаата.

«Саха сирэ» хаһыат, edersaas.ru

Хаартыска sakha.gov.ru