Айсен Николаев БКЭ-ни 100 баалга туттарбыт үөрэнээччилэри уонна кинилэр учууталларын эҕэрдэлээтэ

Бүгүн, от ыйын 11 күнүгэр, Саха сирин баһылыга Айсен Николаев БКЭ-ни 100 баалга туттарбыт оскуоланы бүтэрээччилэри уонна кинилэри үөрэппит учууталлары истиҥник эҕэрдэлээтэ. Быйыл 23 үөрэнээччи муҥутуур көрдөрүүнү ситистэ. Кинилэртэн Назар Павлов уонна Виталий Красиков – иккилии биридимиэккэ 100-түү баалы ылбыттар. Урут этиллибит курдук, эксээмэннэрин 100 баалга туттарбыт хас биирдии оҕо 100 тыһыынча солкуобайдаах сэртипикээккэ тигистэ.

“Биир кэлим эксээмэн түмүгүнэн 100 баалы ылыы – бу кыһамньылаах, туруу үлэһит буолуу,  туруоруммут сыалы ситиһии уонна билиигэ-көрүүгэ дьулуһуу, таптал муҥутуур түмүгэ. Маннык сөҕүмэр түмүгү учууталлара суох ситиспэккин. Кинилэр бэйэлэрин үөрэнээчилэрин кыайыыларыгар уопуттарын уонна билиилэрин эрэ буолбакка, истиҥ тапталларын уонна кыһамньыларын уураллар. Төрөппүттэргэ анаан-минээн махталбын эмиэ биллэрэбин. Эһиги истиҥ тапталгыт уонна өйөбүлгүт  оҕолоргутугар бэйэлэрин күүстэригэр эрэли мэктиэлиир”, — диэтэ Айсен Николаев.

БКЭ түмүктэринэн 100 баалы ылбыттар истэригэр икки биридимиэккэ – математикаҕа уонна химияҕа муҥутуур түмүгү ситиспит,  Н.А.Алексеева Тэхиньиичэскэй лиссиэйин бүтэрбит  Назар Павлов уонна литератураҕа уонна нуучча тылыгар А.А.Константинова аатынан орто оскуола үөрэнээччитэ Виталий Красиков бааллар.

Айсен Николаев этэринэн, киин куорат оскуолаларыгар эрэ буолбакка, Эльдикан курдук дьоҕус нэһилиэнньэлээх пууннарга эмиэ сүүс бааллаах үөрэнээччилэр үүнэн тахсаллар. Ил Дархае Н.А.Алексеева Тэхиньиичэскэй лиссиэйэ эмиэ үрдүк планканы тутар диэн бэлиэтээтэ.

Өрөспүүбүлүкэ үрдүнэн ыллахха, оскуоланы бүтэрбит оҕолортон  БКЭ-ни 100 баалга литератураҕа — 8 оҕо, нуучча тылыгар – 7, математикаҕа –3, химияҕа – 3, информатикаҕа уонна инфокоммуникационнай технологияларга – 2 оҕо ыллылар.  

Өрөспүүбүлүкэтээҕи лиссиэй-интэринээти бүтэрбит Василий Парников биир кэлим судаарыстыбаннай эксээмэҥҥэ бэлэмнэнэллэригэр өйөбүллэрин иһин учууталларга уонна төрөппүттэргэ махтанна. Ону тэҥэ кини ситиһиилээхтик үөрэнэргэ өрөспүүбүлүкэҕэ бары кыах тэриллэрин бэлиэтээтэ.

Эльдикан орто оскуолатын учуутала Любовь Бороздунова педагогтар ааттарыттан оскуоланы бүтэрээччилэр үрдүк ситиһиилэригэр төһүү буолбут педагогтар уонна төрөппүттэр өҥөлөрүн сөпкө сыаналыылларыгар махтанна. “100 бааллаах түмүктэри киин куорат ааттаах-суоллаах гимназиялара уонна лиссиэйдэрэ эрэ буолбакка, өрөспүүбүлүкэ араас муннуктарыттан опсай үөрэхтээһин оскуолалара көрдөрөллөрө олус хайҕаллаах. Уус Маайа оройуонун бүтэрээччилэр сүрүннээн эксээмэннэрин дьоһуннук туттараллар, ол иһигэр нуучча тылыгар. Быйыл аан бастаан оройуоммут үөрэнээччитэ Виталий Красиков икки биридимиэккэ 100 баалы ситистэ. Бу барыбыт сүҥкэн үлэбит, ыарахаттары бииргэ туорааһын түмүгэ”, — диэтэ кини.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Андрей Сорокин хаартыската, СИА

Бэлэмнээтэ Женни Стрюкова.