Үөрэх үлэһиттэрин Атырдьах ыйынааҕы мунньахтарын түмүктүүр тэрээһиҥҥэ Ил Дархан Айсен Николаев педагогтарга бэйэтин тылын, санаатын тиэртэ. Итиэннэ өрөспүүбүлүкэҕэ биир даҕаны оскуола сабыллыа суоҕа диэн иһитиннэрдэ.
Ил Дархан үөрэх үлэһиттэригэр, педагогическай уопсастыбаннаска санаатын тиэртэ. Болҕомтону уопсай үөрэхтээһиҥҥэ ууруохха наадатын ыйда. Саха сирин олохтоохторун долгуппут 202-с нүөмэрдээх уураах туһунан эмиэ эттэ. “Билэргит курдук, 202-с нүөмэрдээх уурааҕы уларытар туһунан быһаарыы ылыллыбыта. Ол да буоллар, үөрэх ситимин тупсарыы уонна көдьүүһүн үрдэтии соруга бэбиэскэттэн уһуллубат. Өссө биирдэ бэлиэтиибин, биир даҕаны оскуола сабыллыа суоҕа, дьыала бүддьүөтү сарбыйыыга буолбатах. Ол эрээри, административнай-салайар, көмөлөһөр үлэһит көдьүүһэ суох элбэҕэ, хас даҕаны сыл устата биир кэлим эксээмэҥҥэ көрдөрүү букатын мөлтөх түгэнэ суох буолуохтаах”, — диэн бэлиэтээтэ итиэннэ кэккэ холобурдары аҕалла. Ол курдук, сорох улуус үөрэнээччилэрэ уустугурдуллубут (профильнай) математикаҕа 9-ка тиийэ намыһах баалы, 24 улууска оскуоланы бүтэрээччилэр нуучча тылыгар куһаҕан сыананы ылбыттарын иһитиннэрдэ.
Санатан эттэххэ, уустугурдуллубут (профильнай) математиканы сүрүннээн математика ирдэнэр үрдүк үөрэхтэргэ туттарсар, тустаах биридимиэти билэбит диир оҕолор талаллар. Онтон нуучча тылыгар ирдэнэр баалы кыайан ылбатахтар хаттаан туттараллар, ол кыаллыбатаҕына аттестаттан маталлар.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.