Айсен Николаев: “Биэрэпис ситиһиилээхтик барарын туһугар барытын оҥоруохпут!”

Ааптар: 
Бөлөххө киир:

Убаастабыллаах Саха сирин олохтоохторо!

Алтынньы 15 күнүттэн сэтинньи 14 күнүгэр диэри Бүтүн Арассыыйатааҕы нэһилиэнньэ биэрэпиһэ ыытыллар. Бу уон сылга биирдэ буолар бэлиэ түгэн өрөспүүбүлүкэ хас биирдии олохтооҕор, араас омуктар түмсэн олорор киэҥ нэлэмэн дойдубутугар уһулуччу суолталаах.

Биэрэпис кэлиҥҥи 10 сыллааҕы уларыйыыны эрэ көрдөрөр буолбатах. Сайдыыга туһаайыллыбыт саҥа сыалы, соругу туруорууга олук уонна уларытыылары киллэриигэ төрүөт буолар. Онон Бүтүн Арассыыйатааҕы биэрэпис түмүгэ өрөспүүбүлүкэҕэ баар балаһыанньаны хайдах баарынан көрдөрөрүн туһугар чопчу буолара суолталаах. Маныаха биэрэпискэ хас биирдии Саха сирин олохтооҕо кыттара ирдэнэр.

Биэрэпис түмүгэ өрөспүүбүлүкэ стратегическай суолталаах быһаарыыларын ылынарга, демографическай, экэнэмиичэскэй уонна социальнай сайдыытын бырагырааматын оҥорорго туһаныллыаҕа. Инфраструктура сайдыытын – суол, тырааныспар, гаас ситимин, уот уонна сибээс лиинийэтин, оскуола, оҕо саада, балыыһа, култуура уонна успуорт эбийиэктэрин тутуутун былаанныырга тутаах ыйыынан буолуохтара.

Ытыктабыллаах биир дойдулаахтарым, бэйэҕит гражданскай эбээһинэскитин толоруҥ, Саха сирин дьонун бары олоҕун хаачыстыбатыгар, төрөөбүт өрөспүүбүлүкэбит сайдыытыгар дьайар кэнэҕэски сокуоннарга, бырагыраамаларга кыттыһыҥ.

Дьаҥ кэмигэр олохтоохтору уонна биэрэписчиттэри харыстыыр инниттэн, быйылгы Бүтүн Арассыыйатааҕы нэһилиэнньэ биэрэпиһигэр  цифровой технология хото туһаныллыаҕа. Хас биирдии киһи Судаарыстыбаннай өҥө порталыгар киирэн биэрэпиһи ааһар кыахтаах, хааччахтааһын эрэсиимин тутуһуу ирдэнэр усулуобуйатыгар бу улахан суолталаах.

Уопсастыбаннай тэрилтэлэр уонна сонуну киэҥник тарҕатара сириэстибэлэр өйөбүллэригэр улахан эрэллээхпин. Гражданскай уопсастыба үтүө сыһыана, биэрэпискэ киирбит илиистэр ыйытыыларыгар өрөспүүбүлүкэ олохтоохторо толору уонна чопчу иһитиннэриини биэрэллэригэр көҕүлүүр.

Күндү доҕоттор, Бүтүн Арассыыйатааҕы биэрэпис ситиһиилээхтик ыытылларын туһугар бары түмсэн кыаллары барытын оҥоруохпут!

Саха Өрөспүүбүлүкэтин Ил Дархана Айсен Николаев.

+1
0
+1
0
+1
0
+1
0
+1
0
+1
0
+1
0