Айсен Николаев: “Бэрэсидьиэн Анал этиитигэр Саха сиригэр суолталаах кэккэ боппуруостар киирдилэр”
Ленскэй кулууп былаһааккатыгар Саха сирин баһылыга Айсен Николаев дойду Бэрэсидьиэнин Владимир Путин Федеральнай Мунньахха Анал этиитигэр Саха сиригэр тыын суолталаах боппуруостары таарыйбытын бэлиэтээтэ.
Бэрэсидьиэн эрэгийиэннэри муҥутуурдук өйүүр миэрэлэрин Ил Дархан аҕынна. Бастатан туран, бу инфраструктураҕа бүддьүөт кирэдьииттэрэ, итилэр маннык бириинсибинэн тыырыллыахтара: аҕыйах иэстээх эрэгийиэҥҥэ – ботуччу кирэдьиити. “Дойдуга кирэдьиит рейтинигэр бастыҥ көрдөрүүлээх, ис иэһин үчүгэйдик салайар Саха сиригэр маннык миэрэ олус суолталаах”, — диэн өрөспүүбүлүкэ баһылыга бэлиэтээтэ.
Саха сирэ чугастааҕы сылларга инфраструктураҕа кэккэ бырайыактары киллэрэр соруктаах. Өрөспүүбүлүкэҕэ эрэ буолбакка, дойду хотугулуу илин өттүгэр Өлүөнэ муостата тыын суолталаах буолуоҕа.
Айсен Николаев тутуу эйгэтигэр Бэрэсидьиэн көҕүлээһиннэрин суолтатын ыйда: “ДОМ РФ” Уһук Илиҥҥэ тутааччыларга сыллааҕыта 3-4 бырыһыаҥҥа иэс биэриэҕэ диэн эрэнэбит. Маны сэргэ цифровой бырайыактааһыны туһаныыга бэлэмнээһин, кэтэх олорор дьиэни тутууну өйөөһүн туһунан этилиннэ. Ыйыллыбыт миэрэлэр саахалланар туруктаах дьиэлэртэн дьону көһөрүү бырагырааматын түргэнник олоххо киллэрэргэ көмөлөһүөхтэрэ, Саха сиригэр маннык дьиэлэр дойду үрдүнэн элбэхтэр.
Бэрэсидьиэн бары судаарыстыбаннай өҥөлөрү 24/7 туһанарга электроннай көрүҥҥэ түргэнник көһөрүүгэ быһаарыыта Саха сирин олохтоохторун олоҕун таһымын үрдэтиэҕэ. “Биһиги киэҥ сирдээх-уоттаах, тэйиччи олорор буолан судаарыстыбаннай уонна муниципальнай өҥөлөрү сыыппараҕа көһөрүүгэ олус наадыйабыт . Бэрэсидьиэн бу быһаарыыта Саха сиригэр түргэнник чугастааҕы сылга туоларын туруулаһыахпыт”, — диэн Николаев бэлиэтээтэ.
Саха сирин курдук элбэх оҕолоох эрэгийиэҥҥэ ийэ буолууну уонна оҕо сааһы өйөөһүн тиэмэтэ тутаах боппуруоһунан буолар. Доруобуйа харыстабылын салаатын өйөөһүн Анал этии дьоһун суолталаах тиэмэтинэн ааттанна. Ил Дархан 2030 сылга Саха сирэ саамай уһун олохтоох эрэгийиэннэр кулууптарыгар киирэр кыахтанарын туһугар дьон-сэргэ доруобуйатын уонна доруобуйа харыстабылын тиһигин стратегическай хайысхаларын туһунан ыйаахха соторутааҕыта илии баттаабытын аҕынна.
Бэрэсидьиэн өрүү буоларын курдук үөрэххэ уонна наукаҕа улахан болҕомтотун туһаайда. Ил Дархан бэлиэтээбитинэн, Бэрэсидьиэн дойду үрдүк үөрэҕин кыһаларыгар саҥа бүддьүөт миэстэлэрин тэрийэр туһунан сорудаҕа, итинтэн 70% эрэгийиэннэргэ бэриллэрэ ыччакка саҥа кыахтары арыйар. Маны сэргэ Айсен Николаев Арассыыйа Наукаларын академиятын Бэрэсидьиэнэ Александр Сергеев соторутааҕыта сырыытын кэнниттэн “Хоту дойду” научнай-үөрэтэр киин Уһук Илин эрэгийиэннэрин коллаборацияҕа үлэтин саҕалаата. “Хоту дойду” киин хайы-үйэ быйыл аан дойду таһымнаах научнай-үөрэтэр киин испииһэгэр киирэр кыахтаах.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан