Айсен Николаев: “Балаҕан ыйа бу ыган кэллэ. Бэс Күөлүгэр тыа хаһаайыстыбатын өттүгэр аһаҕас боппуруостар элбэхтэр»
Горнай улууһун Бэс Күөлүгэр ойуур баһаара имири сотон ааспыт учаастактарын чөлүгэр түһэрии үлэтэ күүскэ ыытыллар. Үлэ хаамыытын Ил Дархан Айсен Николаев бэйэтин тус хонтуруолугар кытаанахтык тутар.
Бэҕэһээ Бэс Күөлүгэр тустаах үлэ хаамыытын хонтуруоллуур мунньахха Айсен Николаев тыа хаһаайыстыбатын быһаарар бырабыыталыстыба үлэһиттэригэр кылгас кэм иһигэр тыа хаһаайыстыбатын өттүгэр туох көмө, үлэ ыытыллыахтааҕын быһаарар нормативнай-правовой базаны бэлэмнииллэригэр сорудахтаата.
«Кырдьыгынан этэр буоллахха, дьиэлэри тутуу хайдах баран эрэрин олохтоохтор көрө сылдьаллар. Оттон тыа хаһаайыстыбатын өттүгэр аһаҕас боппуруос элбэх. Балаҕан ыйа бу ыган кэллэ. Аҥаардас туох көмө оҥоһуллуохтааҕын эрэ быһаарса сылдьыбыкка, тустаах үлэни бу күннэргэ саҕалыаххайыҥ. Бэс Күөлүн чөлүгэр түһэрии боппуруоһа РФ Бэрэсидьиэнэ Владимир Путин тус хонтуруолугар сылдьар», — диэн эттэ.
СӨ Бырабыыталыстыбатын Бэрэссэдээтэлин солбуйааччы Михаила Никифоров иһитиннэрбитинэн, 26 хаһаайыстыба ойуур баһаарыттан эмсэҕэлээбит. Ол курдук, 9 ынах сүөһү, 8 сибиинньэ, 20 куурусса уонна 120 куруолук уокка былдьаммыттар. 223 сүөһү турар 10 хотон, 8 тиэхиньикэ уонна тыа хаһаайыстыбатыгар туһаныллар 4 оборудование, 12 км уһуннаах көрүө-хаһаа уонна 212 туонна от умайбыт. Уопсайа 61 мөлүйүөн солкуобайдаах хоромньу тахсыбыт. «Атамай» бааһынай хаһаайыстыбатын 100 сүөһүгэ аналлаах комплексы сэргэ, чааһынай дьон хотоннорун тутарга быһаарыы ылыллыбыт. Дьиэни тутууга курдук баҕалаах дьон хотоннорун оннугар харчынан эмиэ ылыахтарын сөп. Бу күннэргэ хотоннору тутуу саҕаланыаҕа.