Айсен Николаев: “Байыаннай үөрэхтээх, уопуттаах дьон ыҥырыллыахтара”

Бөлөххө киир:

“РФ бэрэсидьиэнэ мобилизация туһунан уустук, ол эрээри дойдуга сүрдээх наадалаах быһаарыныыны ылынна. Бастатан туран, манна саппааска уонна туһааннаах байыаннай уопуттаах дьон ыҥырыллыахтара”, – диэн иһитиннэрдэ Ил Дархан Айсен Николаев бүгүн “Россия24” ханаалыгар быһа эпиир кэмигэр.

РФ бэрэсидьиэнэ Владимир Путин бүгүн, балаҕан ыйын 21 күнүгэр, Арассыыйаҕа аармыйаҕа быстах мобилизациялааһын туһунан ыйаах таһаарбыта. Айсен Сергеевич бэлиэтииринэн, бу мобилизацияҕа, бастатан туран, аармыйаҕа саппааска сылдьар уонна туһааннаах уопуттаах дьоннор хапсыахтара.

Көрөргүт курдук, арҕааҥҥы дойдулар Арассыыйа күүһүрүөн баҕарбат. РФ бэрэсидьиэнин быһаарыныыта уустук, ол эрээри дьон-сэргэ интэриэһин көмүскүүргэ, Украинаҕа, Донбааска дьону быыһыырга, дойдубут чөл туруктаах хаалыытыгар, бэйэбит интэриэспитин көмүскүүрбүтүгэр сүрдээх наадалаах быһаарыныы. Мобилизация дьоҥҥо-сэргэҕэ барытыгар тарҕаммат. Манна саппааска сылдьар уонна туһааннаах байыаннай үөрэхтээх, уопуттаах дьон барыахтара. Эрэгийиэннэринэн, РФ бэрэсидьиэнин быһаарыытынан, квота көрүллэн турар, оройуоннарга сотору кэминэн иһитиннэрии барыаҕа.  РФ оборуонатын миниистирэ иһитиннэрбитинэн, саппааска сылдьар дьонтон биир бырыһыаннара ыҥырыллыаҕа. Экэниэмикэ чааһын эттэххэ, мин санаабар, бу быһаарыныы Саха сиригэр да, Арассыыйаҕа да улаханнык охсуо суоҕа, – диэн иһитиннэрэр Айсен Сергеевич.

Санатан эттэххэ, бу иннинэ Ил Дархан өрөспүүбүлүкэ байыаннай комиссарын Александр Авдонинныын көрсүбүтэ, ону сэргэ бырабыыталыстыба чилиэннэрин, Ил Дархан, бырабыыталыстыба дьаһалтатын кытары РФ бэрэсидьиэнэ Владимир Путин аармыйаҕа ыҥырыы туһунан ыйааҕын кэпсэппитэ. Улуустар баһылыктарын кытары көрсүһүүгэ бу боппуруоһу эмиэ таарыйан ааспыта.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0