Айсен Николаев Бүлүү өрүс киртийиитин туһунан эттэ

Бөлөххө киир:

Бүлүү өрүскэ түспүт уу химическэй туох да эттигэ суоҕун, киһиэхэ кутталы үөскэппэтин туһунан бүгүн Ил Дархан э.т. Айсен Николаев “Саха” НКИХ ханаалыгар быһа эфир кэмигэр иһитиннэрдэ.

Санатан эттэххэ, бу нэдиэлэҕэ Айсен Николаев Сунтаарга сылдьан, “АЛРОСА” хампаанньа салалтатын, Сунтаар улууһун баһылыктарын, дьокутааттары, уопсастыбаннаһы кытары бу боппуруоска улахан мунньах ыыппыта.
“Кырдьык, улахан иэдээн таҕыста. Мирнэй улууһугар өссө хаһан да маннык күүстээх ардах түһэ илигэ. Иирэлээх күөл даамбата ити ууну барытын тулуйбатаҕын түмүгэр, “АЛРОСА” хампаанньа полигонун саппыт. Кирдээх уу барыта саба халыйан тахсан, Бүлүү өрүскэ түстэ. Киһиэхэ кутталлаах химическэй эттиктэр суохтар”, — диэн этэр Айсен Николаев.
Айсен Сергеевич билигин уу ыраастанан эрэрин, сааскы халаан уутун кэминээҕи көрдөрүүтүгэр түспүтүн иһитиннэрэр. “Сунтаар улууһун сорох нэһилиэктэрин аннынан ыраастанна. Өссө нэдиэлэ курдук бу маннык туруоҕа. Хампаанньа билигин бары миэрэлэри ылынна, содулу туоратыыга үлэлэһэр. Ыытыллыбыт үлэ туһунан күннэтэ миэхэ иһитиннэрэ олорор”, — диэн этэр кини.
Уонна бу боппуруоска сыһыаран, кирдээх уу содулугар түбэспит оройуоннар көмө харчыны ылыахтарын, билигин хоромньуну ааҕыы бара турарын иһитиннэрдэ. Ону сэргэ ууну ыраастааһын, сооружениелары туруоруу билиҥҥи кэм ирдэбилэ буолбутун бэлиэтээн эттэ.

Аграфена КУЗЬМИНА, “Саха сирэ” хаһыат.

+1
0
+1
0
+1
0
+1
0
+1
0
+1
0
+1
0