Айсен Николаев “Бүлүү” федеральнай суолугар муосталары тутууну көрдө

Саха сиригэр “Бүлүү” федеральнай массыына суолугар быйыл түөрт муоста тутуута түмүктэниэҕэ. Муостанан туорааһын Түүкээн, Саһар Үрэх, Улахан Муҥур уонна Аччыгый Ботуобуйа өрүстэргэ тутуллар.

Үлэ хаамыытын Үөһээ Бүлүү уонна Мииринэй оройуоннарыгар оробуочай сырыытын кэмигэр Айсен Николаев билистэ. Өрөспүүбүлүкэ баһылыга Түүкээн уонна Аччыгый Ботуобуйаны туоратар муосталар тутууларын көрдө.

Бастакы күн Айсен Сергеевич Үөһээ Бүлүү уонна Ньурба оройуоннарын быысаһар сирдэригэр, Бүлүү федеральнай массыына суолун 702-с килэмиэтиригэр баар Түүкээни туоруур муостаны көрдө. Маны тутууга федеральнай бүддьүөттэн 2,5 млрд солкуобай кэриҥэ көрүллүбүтэ. 2018 сыллаахха тутар үлэни “Хотьковский автомост” хампаанньа саҕалаабыта. Муоста уһуна 267 погоннай миэтэрэ, итиннэ кэлии – 4 км.

Ил Дарханы кытта көрсүһүүгэ бэдэрээтчит үлэ урутаан иһэрин эттэ. Тирэхтэр оҥоһуллубуттар, итиннэ сыстар суол уонна суол алын араҥата кутуллубут. Бүгүн тутааччылар пролетнай тутуулары таҥыыны түмүктүүллэр, ити кэнниттэн гидроизоляцияҕа уона асфалы уурууга киириэхтэрэ.

Мииринэй оройуонугар Аччыгый Ботуобуйаны туоратар муостаны  “ВостСибСпецМонтаж” ХЭТ тутар. Манна тирэхтэри туруоруу, сир балаһатын кутуу түмүктэммит.

Өрөспүүбүлүкэ баһылыга даамбалары бөҕөргөтүүнү, суолу таҥастааһыны көрдө. Бу муостанан туорааһын 191 погоннай миэтэрэ уһуннаах.

Сунтаар оройуонугар Сааһыыр Үрэҕи уонна Улахан Муҥур үрэҕи туоратар  муосталары тутуу “Магистральнай инфраструктураны саҥардыы уонна кэҥэтии кэлимсэ былаана” национальнай бырайыагынан ыытыллар. “Бүлүү Упрдор” ФКТ иһитиннэрбитинэн, тутар үлэлэр былаан быһыытынан бараллар.

Саҥа муосталарынан бастакы массыыналар алтынньы бүтүүтэ – сэтинньи саҕаланыыта ааһаллара күүтүллэр. Онон кэлэр сылтан бонтуон муосталар наадата суох буолуохтара.

Санатан эттэххэ, кэлэр сылга үөһээ Бүлүү сэлиэнньэтин оройуонугар Бүлүү эбэни туоратар бастакы муостанан туорааһын тутуута саҕаланыаҕа. Ити Дьокуускайтан Ньурбаҕа диэри сылы эргиччи сырыыны хааччыйыаҕа. Быйыл олунньу ыйга “Бүлүү” упрдор” тэрилтэ “Хотьковский мост” хампаанньаны кытта хантараак түһэрсибитэ.

Бүлүү трассатыгар Марханы туоратар массыына муостата тутуллубута. Чугастааҕы сылларга Бүлүүнү туоратар өссө үс муоста былааннанар. Бу өрөспүүбүлүкэ кииниттэн Мииринэйгэ харгыһа суох тиийиини хааччыйыаҕа.

Саха Өрөспүүбүлүкэтин Ил Дарханын уонна  Саха Өрөспүүбүлүкэтин Бырабыыталыстыбатын пресс-сулууспата

Хаартыска: Мария Васильева түһэриитэ

Бэлэмнээтэ Женни СТРЮКОВА.