Сүрүн Экэниэмикэ

Айсен Николаев: «Атомнай энэргиэтикэ Арктика улуустарын сайыннарыыга төһүү күүһүнэн буолуоҕа»

Бүгүн, алтынньы 13 күнүгэр, Айсен Николаев Абый улууһун Белай Горатыттан  видео-кэмпириэнсийэ  көмөтүнэн «Арассыыйатааҕы  энэргэтиичэскэй нэдиэлэ» диэн  аан дойдутааҕы пуорум чэрчитинэн, «Эрэгийиэннэргэ уонна бырамыысыланнаска аччыгый атомнай энэргиэтикэ оруола, эниэргийэнэн хааччыйыы» диэн сиэссийэҕэ кытынна. 

Кини  Усуйаана улууһугар  Росатомы кытта бииргэ  атомнай ыстаансыйаны тутуу бырайыагын туһунан кэпсээтэ.  Ил Дархан  кииннэммит эниэргийэнэн өрөспүүбүлүкэ  64 % сирэ-уота хабылла илигин туһунан иһитиннэрдэ.  Бу манна сүнньүнэн 143 дизельнэй ыстаансыйа көмөтүнэн уотунан хааччыллааччылар киирэллэр.  Ити сири-уоту уотунан хааччыйыыга  сыл аайы 11 млрд. солк. уонна  судаарыстыбаннай бүддьүөттэн субсидия быһыытынан 10 млрд солк. көрүллэр.  Арыый да улахан нэһилиэнньэлээх пууннары уотунан хааччыйыыга  күн уонна тыал көмөлөрүнэн эниэргийэни оҥорор ыстаансыйалары туһаныыга аналлаах бырайыактары олоххо киллэрбиттэр.

Айсен Николаев  Арктика түөлбэтигэр  бырамыысыланнай бырайыактары олоххо киллэриигэ  бары өттүнэн аччыгый атомнай ыстаансыйалар  көдьүүстээх буолуохтаахтарын туһунан тоһоҕолоон бэлиэтээтэ.  Бу ыстаансыйа Усуйааны улууһун бары нэһилиэктэрин уонна  Арассыыйа үрдүнэн биир саамай элбэх көмүс баайдаах Күчүс диэн сири туһаҕа таһаарыыга уотунан хааччыйыаҕа. «Арктика сирин-уотун баһылааһыҥҥа бырамыысыланнай, социальнай хайысхалар уонна  экологическай өттүнэн ыраас атомнай ыстаансыйа бииргэ түмүллэн үлэлээһиннэрэ Саха сирин Арктическай  түөлбэтин  хаачыстыбалаах  энэргиэтикэнэн хааччыйыыга бастакы хардыынан буолар», — диэн Айсен Сергеевич быһааран биэрдэ.

 

edersaas.ru

0
0