Айсен Николаев арктическай оройуоннарга чэпчэтиилээх билиэттэри атыылыырга соруйда

Ил Дархан Айсен Николаев балаҕан ыйыгар арктическай улуустарга чэпчэтиилээх билиэт атыытын сөргүтэргэ сорудахтаата.

Бырабыыталыстыба бу сыалга 175 мөлүйүөн солкуобайы буларга эттэ. Сорудах бэйэни салайыныы мунньаҕын кэмигэр бэрилиннэ. «Кэлиҥҥи кэмҥэ хоту улуустар сөмөлүөтүнэн көтөр билиэттэрэ олус ыараабытын туһунан бэлиэтииллэр. Үгүс киһи миэхэ бу боппуруоска тахса сылдьыбыта. Онон бу боппуруоһу быһаарарга уолдьаста. Чэпчэтиилээх билиэттэр Арктика улуустарын олохтоохторугар балаҕан ыйыттан атыыланыахтарын наада», — диэн эттэ Айсен Николаев.

Субсидияҕа көрүллүбүт харчы туһаныллан бүппүт буолан, чэпчэтиилээх билиэт атыыта тохтоон турар.

Бу иннинэ Аҕа баһылык 14 ыраах сытар арктическай нэһилиэнньэлээх пууннарга чэпчэтиини көрбүтэ. Быйылгыттан ыла бырагыраама усулуобуйата кэккэ түһүмэххэ уларыйбыта.

Ыспыраапка: Дьокуускай – Баатаҕай туһаайыыга авиабилиэт сыаната — 22 900 солк., субсидиаламмтариф – 9 100 солкуобай. Дьокуускай – Сааскылах: 36 565 солк., субсидияламмыт тариф – 14 600 солк., Дьокуускай – Муома: 24 855 солк., субсидияламмыт тариф – 9 900 солк. Дьон саамай көтөр туһаайыылара — Баатаҕай, Тиксии, Өлөөн, Чокурдаах.

Елена ПОТОЦКАЯ, «Саха сирэ» хаһыат