Айсен Николаев Арассыыйа Бырабыыталыстыбатын хамыыһыйатын мунньаҕар өрөспүүбүлүкэҕэ дьоһун суолталаах боппуруостары туруоруста
Атырдьах ыйын 10 күнүгэр Ил Дархан э.т. Айсен Николаев Камчаткатааҕы Петропавловскайга Бырабыыталыстыба Бэрэссэдээтэлэ Дмитрий Медведев салайан ыыппыт Уһук Илин уонна Байкал эрэгийиэннэрин социальнай-экономическай сайдыыларын боппуруостарыгар Бырабыыталыстыба хамыыһыйатын мунньаҕар кыттыыны ылла.
edersaas.ru.
Мунньахха Уһук Илин социальнай-экономическай сайдыытын боппуруостарын, Бэрэсидьиэн Владимир Путин «ыам ыйынааҕы» ыйааҕын, бөдөҥ инвестбырайыактары олоххо киллэрии, экологическай туризмы сайыннарыы тула киэҥ кэпсэтии таҕыста. Ол түмүгүнэн Дмитрий Медведев кэккэ федеральнай министиэристибэлэргэ «ыам ыйынааҕы» ыйааҕы олоххо киллэриигэ үбүлээһин сыыппаратын уонна чорботуллар хайысхалары уталыппакка быһаарарга чопчу дьаһаллары биэртэлээтэ. Үбүлээһини «ыам ыйынааҕы» ыйаах бары параметрдарын толорор сыаллаах быһаарарга сорудахтаата.
Ил Дархан э.т. Айсен Николаев тыл этэригэр өрөспүүбүлүкэҕэ улахан суолталаах кэккэ боппуруостары таарыйда. Бастатан туран, Уһук Илин түөрт эрэгийиэнигэр (Саха сиригэр, Магадаҥҥа, Камчаткаҕа, Чукоткаҕа) доруобуйа харыстабылын ситимигэр бүддьүөт ороскуотун индексэтэ олохтоммут нормативтан улаханын, ол түмүгэр Саха өрөспүүбүлүкэтигэр медицинэ булгуччулаах страховкалааһынын пуондатыгар быйыл 4 млрд. солк. тиийбэтин ыйда. Бырабыыталыстыба Бэрэссэдээтэлэ ону өйөөн, туһааннаахтарга сорудах биэрдэ, онон, Үп министиэристибэтэ Доруобуйа харыстабылын министиэристибэтин кытары дьаһал ылалларыгар эрэл үөскээтэ. Иккис этии хаарбах дьиэттэн дьону көһөрүүгэ, тырааныспар инфраструктурыгар уонна экологическэй туризмҥа туһуланна.
Ил Дархан эбээһинэһин толорооччу «Өлүөнэ туруук хайалара» Айылҕа пааркатыгар Национальнай паарка статуһун иҥэрэр туһунан быһаарыы ылыллыбытын иһин Дмитрий Медведевкэ махтанна. Ону сэргэ Арассыыйа сүтэн эрэр кыылларын испииһэгэр Саха сиригэр ууһатыллар бизону киллэрэр наадатын эттэ (оччотугар бу кыылы тарҕатыыга федерацияттан эбии үп көрүллүөҕэ). Премьер-миниистир ол этиини эмиэ өйөөтө диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» edersaas.ru.