Бүгүн Арассыыйа үрдүнэн байыаннай албан аат күнэ бэлиэтэнэр. Ил Дархан Айсен Николаев аан дойду иккис сэриитэ Уһук Илин эрэгийиэннэргэ кэлэн түмүктэммитин бэлиэтээн туран, бу күн сэрии толоонугар сырдык тыыннара быстыбыт хорсун саллааттар, ууну-уоту ортотунан ааспыт дьоруойдар ааттара ааттаныахтааҕын санатан эттэ.
Былырыын РФ бэрэсидьиэнэ Владимир Путин Өйдөбүнньүк уонна албан аат сылын биллэрбитэ. Сыл устата араас хабааннаах үлэлэр барбыттара. Ол түмүгэр историческай чахчыларга олоҕуран, Аан дойду иккис сэриитэ түмүктэммит күнэ балаҕан ыйын 3 күнүнэн билиниллибитэ. Бу иннинэ балаҕан ыйын 2 күнүгэр бэлиэтэнэр этэ.
“Бүгүн Арассыыйа байыаннай Албан аатын күнүн – аан дойду иккис сэриитэ түмүктэммит күнүн – бэлиэтиибит. Билиҥҥи кэмҥэ, ордук аан дойду историятын токурута тутан суруйа сатыыр кэмнэригэр, дойдубутун көмүскээбит буойуннарбытын, кинилэр хорсун быһыыларын кэлэр кэнчээри ыччаппытыгар тириэрдэр – биһиги ытык иэспит. Быйыл Улуу Кыайыы 76 сыла. Кэм-кэрдии аастаҕын аайы бэтэрээннэрбит олорон ааспыт олохторо, хорсун быһыылара, дойдуларын туһугар олохторун толук уурбуттара, оччотооҕу кэм алдьархайа биһиги өйбүтүгэр-санаабытыгар дириҥник иҥэн иһэр. Оччотооҕу көлүөнэ албан аатын үйэтитии, кинилэр үлэлээбит үлэлэрин, төрөөбүт дойдуларын, өрөспүүбүлүкэлэрин сайыннарарга ылсыбыт дьыалаларын сырдатыы кэнэҕэскитин да бара туруоҕа”, – диэн бэлиэтиир Ил Дархан Айсен Николаев.
Кэлиҥҥи сылларга сэрии толоонугар сураҕа суох сүппүт буойуннар ааттарын, кинилэр көмүс уҥуохтарын көрдөөһүн Арассыыйа үрдүнэн киэҥ хабааннаахтык ыытыллар буолла. Көрдүүр-чинчийэр этэрээттэр көмөлөрүнэн, 70-тан тахса сыл устата сураҕа суох сүппүт саллааттар ааттара булулунна.
“Саха сириттэн сэриигэ баран сураҕа суох сүппүт саллааттар ааттарын көрдөөһүн сыл устата тохтоло суох ыытыллар. Билигин төһө да коронавирус кэмэ буоллар, кинилэргэ өйдөбүнньүгү туруоруу, мемориаллары чөлүгэр түһэрии тохтоло суох бара турар. Манна даҕатан, Саха сирин көҕүлээһининэн Тверь уобалаһыгар Ржев оройуонугар Сэбиэскэй Сойуус дьоруойа Федор Охлопков аатынан сылы эргиччи үлэлиир байыаннай-патриотическай лааҕыр аһыллыбытын бэлиэтиир тоҕоостоох. Бу лааҕыр көрдүүр-чинчийэр этэрээттэр түмсэр кииннэринэн буолла”, – диэн этэр Айсен Сергеевич.
Аграфена КУЗЬМИНА