Айсен Николаев Арассыыйаҕа орто анал үөрэхтэр баазаларын саҥардар ирдэнэрин бэлиэтээтэ

РФ Судаарыстыбаннай сэбиэт “Үөрэх” хайысхатыгар хамыыһыйатын мунньаҕар 2021 сыл үлэтин түмүгүн таһаардылар уонна орто анал үөрэх эйгэтигэр исписэлиистэри бэлэмнээһин боппуруоһун көрдүлэр.

Мунньаҕы хамыыһыйа бэрэссэдээтэлэ, Кировскай уобалас губернатора Игорь Васильев ыытта. Тэрээһиҥҥэ РФ Үөрэҕириигэ миниистирэ Сергей Кравцов, эрэгийиэннэр баһылыктара тыл эттилэр.

Саха сирин Ил Дархана Айсен Николаев үлэ уонна “Орто анал үөрэх” хайысхатыгар оробуочай бөлөх чилиэннэрин түмүк санааларын кэпсээтэ.

Ил Дархан эрэгийиэннэргэ үгүс орто анал үөрэх (СПО) тэрилтэлэрэ ааспыт үйэ 70-с сылларыгар тутуллубут дьиэлэргэ-уоттарга үлэлии олороллорун эттэ. Кини иһитиннэрбитинэн, бүтэһик сылларга тыһыынчаттан тахса орто анал үөрэх тэрилтэтин үөрэтэр-оҥорон таһаарар тэрилэ кыайан саҥардыллыбатах. Бу уопсай ахсаантан 26 % буолар. Бу сылларга баара-суоҕа 738 кэллиэс материальнай-тиэхиньиическэй баазатын 50-тан тахса бырыһыана саҥардыллыбыт. Айсен Николаев ааспыт уон сылга дойду эрэгийиэннэрин бэйэлэрин орто анал үөрэҕин систиэмэтин үбүлээһини эбэр кыаллыбатаҕын бу чахчылар этэллэрин бэлиэтээтэ. Ону ааһан, бырагыраама муҥутуур уонна биир устудьуоҥҥа тиксэр үбүлээһинин кээмэйин ылан көрдөххө, аччаабыт.

Маннык усулуобуйаҕа идэ ыстандаартын, инники күөҥҥэ сылдьар технологияларынан WorldSkills ыстандаартын хаачыстыбатын үрдэтэри хааччыйар туолар кыаҕа суох.

Айсен Николаев орто анал үөрэх эйгэтигэр туруоруллубут соругу ситиһэргэ үөрэх баазатын (инфраструктура) биллэрдик уонна систиэмэлээхтик саҥардар ирдэнэр диир.

“Салгыы орто анал үөрэх баазатын хантан үбүлээн сайыннарыы боппуруоһа аһаҕас турар. Биһиги оробуочай бөлөхпүт дойду туһааннаах министиэристибэлэригэр саҥа дьиэлэри, устудьуоннар кампустарын тутуулары уонна орто анал үөрэҕин тэрилтэлэригэр хапытаалынай өрөмүөнү ыытыыны федеральнай бырайыактарга киллэрэргэ сүбэ сурукпутун ыыталаатыбыт”, — диэн Айсен Николаев эттэ.

2012 сылтан үлэ төлөбүрүн ороскуотун өлүүтэ биллэ эбилиннэ, ол эрээри, уопсайынан орто анал үөрэх систиэмэтин судаарыстыбаттан үбүлээһин быстах ирдэбиллэри эрэ хааччыйар. Айсен Николаев орто анал үөрэх систиэмэтин федеральнай тус сыаллаах бырагыраамалар, ону тэҥэ, национальнай бырайыактар сайыннардылар диэн бэлиэтиир. РФ Үөрэҕириитин министиэристибэтин уонна Стратегическай көҕүлээһиннэр агентстволарын бырайыактыыр көҕүлээһиннэрэ үтүө түмүктээхтэр. Ол гынан баран, федеральнай бырайыактар анал тиэхиньиическей үөрэхтээһин уопсай ороскуотун 10-тан тахса бырыһыанын эрэ сабар. Кэллиэстэргэ тэриллэри (оборудование) ылыы чааһыгар орто анал үөрэх тэрилтэлэрин түөрт гыммыт биирин эрэ хабар.

“Бу чопчу үбүлээһиннэр биирдиилээн тэрилтэлэр материальнай баазаларын тупсараллар, оттон туруоруллубут соругу быһаарарга систиэмэлээх хамсааһын ирдэнэр”, — диэн Айсен Сергеевич бэлиэтээтэ.

Санатан эттэххэ, СӨ Ил Дархана РФ Судаарыстыбаннай сэбиэтин “Үөрэх” хайысхатыгар “Орто анал үөрэх” хамааһыйатын оробуочай бөлөҕүн салайааччыта.

СӨ Ил Дарханын уонна Бырабыыталыстыбатын дьаһалтатын пресс-сулууспата.

Хаартыска: Андрей СОРОКИН (СИА).