Өрөспүүбүлүкэ биллэр баана «Алмазэргиэнбанк» АУо АКБ ааспыт сылы хайдах түмүктээбитий? Манна ааҕыҥ.
Төһө да хамсык кэмэ буоллар, “Алмазэргиэнбанк” АУо АКБ 2020 сыл түмүгүнэн соруктарын толорон, өрөспүүбүлүкэҕэ үп бөдөҥ института буоларын бигэргэттэ. Бу туһунан Саха сирин Ил Дархана Айсен Николаев тохсунньу 12 күнүгэр тустаах баан үлэтин түмүктэрин уонна 2021 с. былаанын көрбүт мунньаҕар эттэ.
2020 сыл устата бу баан үп-харчы өттүгэр үтүө түмүктэри ситистэ. Алмазэргиэнбанк туруктаах буолуутун сүрүн рейтини таһаарар агентстволар бигэргэттилэр. Билигин “Алмазэргиэнбанк” АУО 300 тыһыынча биирдиилээн дьону уонна 6,5 тыһыынча корпоративнай килийиэннэри хааччыйар.
Баан Бырабылыанньатын Бэрэссэдээтэлэ Николай Долгунов иһитиннэрбитинэн, ааспыт сылга баан “Уһук Илиҥҥи ипэтиэкэ” бырагырааманан дьоҥҥо кирэдьиити биэрбит уонна биэрбит үбүн кээмэйинэн өрөспүүбүлүкэҕэ үһүс, Уһук Илиҥҥэ бэһис миэстэҕэ таҕыста. 2020 сылга “Алмазэргиэнбанк” АУо “Уһук Илиҥҥи ипэтиэкэ” бырагырааманан 620 мөл солкуобайтан тахса суумалаах кирэдьиити биэрдэ.
“2020 сылга баан барыһа 2,3 млрд солкуобайга тэҥнэстэ эбэтэр былаантан 108 бырыһыаҥҥа. Ыраас барыһа барыллаан ааҕыынан 151 мөл солк. тэҥнэһэр. Отчуоттуур кэм устата баан хапытаалын 145 мөл солк. үүнүүтэ күүтүллэр, ити 4,6 млрд солкуобай кэриҥэ”, — диэтэ Николай Долгунов.
2021 сылга АЭБ сайдыытын былаана чопчуланна. Чуолаан, корпоративнай биисинэһи сайыннарыыга баан Национальнай бырайыактары олоххо киллэриигэ кыттыаҕа, ол иһигэр дьону саахалланар дьиэ пуондатыттан көһөрүүгэ, хаачыстыбалаах суолларга.
“Розница блогар биһиги өрөспүүбүлүкэни кытта Арассыыйа Баанын, Түргэн төлөбүрдэр тиһиктэрин кытта цифровой бородуукталарга көҕүлээһиннэрин олоххо киллэриигэ бииргэ үлэлээһини былаанныыбыт. Билигин “СВОИ” бырайыагы, каарта биисинэһин, мобильнай сервистэри сайыннарыыга дьулуһабыт”, — диэн эбэн эттэ Долгунов.
Мунньах кыттыылаахтара “Алмазэргиэнбанк” АУо АКБ төһө да ыарахаттар баалларын үрдүнэн, 2020 сылы үпкэ дьоһун көрдөрүүлэрдээх түмүктээбитин бэлиэтээтилэр, ити бу сылга эрэли саҕарын эттилэр. Маны баан уонна Кэтээн көрөр сэбиэт салалталарын ыытар сөптөөх бэлиитикэтинэн ситистилэр.
Айсен Николаев “Алмазэргиэнбанк” сайдыы институтун быһыытынан судаарыстыбаннай бырагыраамалары уонна инвестиция бырайыактарын олоххо киллэриигэ көхтөөхтүк кыттыахтааҕын бэлиэтээтэ. Онон сибээстээн эрэгийиэн Бырабыыталыстыбата тустаах бааны кытта ыкса үлэлээһини олохтуохтаах.
СӨ Ил Дархан уонна Бырабыыталыстыба пресс-сулууспата
Мария Васильева хаартыскаҕа түһэриитэ
Бэлэмнээтэ Женни Стрюкова.