Айсен Николаев Алмаас саҥардыллыбыт сэбиэтин бастакы мунньаҕын ыытта

Ааптар: 
Бөлөххө киир:

Атырдьах ыйын 13 күнүгэр Айсен Николаев Алмаас сэбиэтин саҥардыллыбыт састаабын бастакы мунньаҕын салайан ыытта. Сүбэ мунньахха тэрилтэ саҥа соруктарын уонна сыалын торумнаатылар. Дойдуга уонна аан дойдуга буола турар уларыйыылар кырыылыыр уонна ювелирнай салаалары сайыннарыыга сыһыаҥҥа уларыйыылары киллэрэри ирдииллэр, Саха сирин кырыылыыр хампаанньаларын сырьенан сүрүн хааччыйааччы “АЛРОСА” хампаанньа эмиэ саҥа тыыннанар.

Сайдыы историческай түһүмэҕэр Алмаас сэбиэтин хаттаан көрүөхтээхпит. Сэбиэт алмааһы кырыылыыр уонна ювелирнай салаалары сайыннарыы боппуруостарыгар, өрөспүүбүлүкэ алмааһы хостуур хампаанньалары кытта сырьеҕа сыһыаннаах сыһыаннаһыыларын, чуолаан кырыылыыр кииннэри, каадырдары бэлэмнээһиҥҥэ үлэлээһиҥҥэ  идэтийбит уонна дьиҥ таһымнаах ырытыылары бэлэмниир  дьоһун, ыйааһыннаах  уорганынан буолуохтаах. Алмаас сэбиэтэ өрөспүүбүлүкэ таһымыгар стратегическай быһаарыныылары ылыныыга тирэҕинэн буолуохтаах”, — диэн регион салайааччыта санаатын эттэ.

Регионнааҕы валовой бородууктаҕа салаалар ылар өлүүлэрин үрдэтэр соругу биисинэс көмөтүнэн судаарыстыба өйөбүлүнэн тэтимнээхтик тиһиктээхтик уонна толкуйдаахтык быһаарар сорук турар. “Бастатан туран, биһиги биисинэспит көмөтүнэн. Биһиги уруккуттан туһанар ньымабытынан – судаарыстыба үбүн-харчытын секторга кута олоруо суохтаахпыт. Бу түгэҥҥэ түмүк хайдаҕа дьэҥкэ – маннык сыһыан туох да үчүгэйгэ тиэрдиэ суоҕа. Биһиги сүрүн соругунан биисинэһи сайыннарыыны туруоруохтаахпыт, хорсун уонна сатаан эргитэр-урбатар кыахтаах кэтэх дьон көҕүлээһинигэр тирэниэхтээхпит.   Маннык хардыы уһун уонна уустук даҕаны буоллун, ол эрээри маннык дьаһаннахпытына, ситиһиигэ кэлиэхпит диэн эрэнэбин”, — диэн тумус тутуллар соруктары чопчулаата Айсен Николаев.

Бу сыаллартан сиэттэрэн, Алмаас сэбиэтин састаабын хаттаан көрдүлэр,  салайааччынан “ЭПЛ Даймонд” хампаанньалар бөлөхтөрүн бырабылыанньатын бэрэссэдээтэлэ Петр Федоров ананна. Сүбэ мунньах кыттыылаахтарыгар Петр Федоровы билиһиннэрэригэр Айсен Николаев кинини биисинэскэ уонна ювелирнай уонна кырыылыыр дьыаланы сайыннарыыга үрдүк таһымнаах киһи быһыытынан сыаналаата.

Бастакы мунньахха кырыылыыр салаа үлэтигэр сыһыаннаһыыны, синтетическай алмааска рынок наадыйыытыгар, ону тэҥэ каадырдары бэлэмнээһин тиһигин тосту тупсарар туһунан кэпсэттилэр.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.  

+1
0
+1
0
+1
0
+1
0
+1
0
+1
0
+1
0