Маны аах Тыа хаһаайыстыбата

Айсен Николаев Аллайыахаҕа таба иитиитинэн дьарыктаныан баҕалаахтар баалларын бэлиэтээтэ

Айсен Николаев бэҕэһээ Аллайыахаҕа сырытын түмүгүнэн олохтоохтор санааларын билсиҥ:

Виктория Трофимова, Аллайыаха улууһун Оленегорскай олохтооҕо:

— Бэҕэһээ өрөспүүбүлүкэбит Ил Дархана Айсен Николаев Аллайыаха улууһугар кэлэн барда. Айсен Сергеевич чопчу тыа хаһаайыстыбатын улууска сайдыытыгар туһуламмыт мунньаҕы ыытта. Онно сырыттым. Мин дьонум Оленегорскайга таба иитиитигэр ылсан эрэллэр. Кини өрөспүүбүлүкэ салалтатын, Бырабыыталыстыбатын, чуолаан, Тыа хаһаайыстыбатын министиэристибэтин өттүттэн өйүөхпүт диэтэ. Аллайыахаҕа табаны иитиинэн дьарыктаныан баҕалаахтар баар буолбуттарын бэлиэтээтэ. Хас да сыл кэнниттэн таба иитиитигэр ылыстылар диэтэ. Онон мунньахха Аллайыаха улууһугар таба иитиитин сайыннарыы бырагырааматын өссө чочуйалларыгар сорудахтаата. Ил Дархан Айсен Николаев Аллайыахаҕа таба иитиитэ уонна балыктааһын сайдыы сүрүн хайысхаларынан буолуохтааҕын тоһоҕолоото.

Хоту дойду олохтоохторо этинэн, атын да бородууксуйанан  хааччыналларыгар таба иитиитин сайыннарыы, чуолаан, Аллайыахаҕа сыһыаннаан эттэххэ, сөргүтүү инники өттүгэр туһалаах буолсу. Чуолаан, бу тас дойдулар сааҥсыйаларын кэмигэр бэйэ олохтоох бородууксуйатын тэнитии, оҥоруу соруга турбутунан.

Бэлэмнээтэ Женни Стрюкова

Хаартыска: В.Трофимова ыыппыта

0
0
Telegram Whatsapp