Айсен Николаев Аллайыахаҕа балыксыттарга сырытта

Ааптар: 
Бөлөххө киир:

От ыйын 26 күнүгэр Аллайыаха оройуонугар Айсен Николаев Ойоотун нэһилиэгин дьиэ кэргэн-аҕа ууһун хаһаайыстыбаларыгар сырытта.

Быйыл судаарыстыба өйөбүлүнэн тэрилтэ улахан кээмэйдээх балык бородууксуйатын харайар булууһу тутуоҕа.

«Кэнники сылларга Аллайыаха оройуонун хас да балыктыыр хаһаайыстыбата кыаҕырда, Дьокуускай ырыынагын сэргэ атын эрэгийиэннэри кытта быһаччы үлэлиир. Өрөспүүбүлүкэ Тыатын хаһаайыстыбатын министиэристибэтин кытта тэриллэрин саҥардаллар, саҥа сыахтары арыйыыга үлэлэһэллэр», — диэтэ Айсен Николаев.

Тэрилтэ салайааччыта Владимир Нестеров этэринэн, тэрилтэ хас да балыктыыр баазалаах, онно тута тоҥорор, брикеттиир уонна балыгы харайар тэриллэрдээх. Тэрили СӨ Тыатын хаһаайыстыбатын министиэристибэтин көмөтүнэн ылбыттар. 2022 сыллаахха тэрилтэ биэдэмистибэҕэ сүүмэрдээһини ааспыта уонна Ойоотун учаастагар булууһу тутууга 12 мөл. солк ылбыта. Тэрилтэ тутууга наадалаах сүрүн матырыйааллары, тымнытар установкалары атыыласпыт, сотору кэминэн кэлэрин кэтэһэр.

Саҥа эбийиэги “Тыа хаһаайыстыбатын сайдыыта уонна 2020–2024 сылларга тыа хаһаайыстыбатын бородууксуйатын, сырьетун, аһын-үөлүн ырыынагын сүрүннээһин» өрөспүүбүлүкэтээҕи судаарыстыба бырагырааматын иһинэн «Бултааһын уонна балык хаһаайыстыбатын комплекса” бырагыраама көмөтүнэн тутуохтара. Бу тэрилтэ 2002 сыллаахха төрүттэммитэ, Индигииргэ 5 балыктыыр уонна күөлгэ 3 учаастактардаах. Сайыҥҥы балыктааһын кэмигэр 40–50 туоннаны бултууллар.

Бу иннинэ Ил Дархан улуус киинигэр Чокуурдаахха балыгы переработкалыыр сыаҕы үөрүүлээхтик арыйыыга кыттыыны ылла. Киирии тылыгар Айсен Николаев Аллайыаха улууһа сайдан иһэрин бэлиэтээтэ. Кини эһиил саҥа оскуола үлэҕэ киириэ, саҥа дьиэлэр тутуллаллар, кирдээх ууну ыраастыыр эбийиэк тутуллуоҕа диэтэ. Балыгы астыыр-үөллүүр сыаҕы үөрүүлээхтик арыйыыга улуус баһылыга Яков Елисеев эмиэ эҕэрдэтин тириэртэ.

«Аллайыаха» община бас-көс киһитэ, быйыл саас «Поле чудес» биэриигэ кыттыбыт, төрөөбүт дойдутун дьиҥнээх патриота Сергей Бережнов саҥа сыах аһыллан, олохтоохторго чэпчэки сыаналаах балык бородууксуйатын атыылыахпыт, кэлин кыамтабытын улаатыннардахпытына, улуус, өрөспүүбүлүкэ тас өттүгэр тахсар кыахтаныахпыт диэн этиитин биир дойдулаахтара биһирии иһиттилэр. Тас дойдулар сааҥсыйаларын кэмигэр уустук суоллаах-иистээх тус хоту дойдуга бэйэлэрин бородууксуйаларын амсайалларын таһынан, Арассыыйа атын олохтоохторун тууһаммыт, ыыһаммыт балык араас көрүҥүнэн хааччыйар кыах Аллайыахаҕа түстэннэ. Үөрүүлээх тэрээһини Максим Дуткин уонна Евгений Слепцов тупсаҕайдык арыйдылар, алҕаатылар.

Женни Стрюкова, «Саха сирэ» хаһыат

Мария Васильева (СИА) хаартыскалара.

+1
0
+1
0
+1
0
+1
0
+1
0
+1
0
+1
0