Сүрүн Уопсастыба Экэниэмикэ

Айсен Николаев Абыйга саҥа аһыллыбыт атыы-логистическай киинин үлэтин кытта билистэ

Абый улууһун Белай Горатыгар «Якутопторг»  атыы-логистическай киинэ аһыллан үлэлээн эрэр. Ол курдук, улуус олохтоохторо  оҕуруот аһын, фруктаны уонна да атын бородууктаны Дьокуускай сыанатынан атыылаһыахтара.

Саамай сүрүнэ, бу киинтэн бородуукта Арктика үс улууһун 12 нэһилиэнньэлээх пуунугар тиэрдиллиэҕэ. Санатар буоллахха, Ил Дархан Айсен Николаев  Арктика улуустарыгар  логистическай кииннэри тутар туһунан 2020 сыллааҕы Анал этиитигэр эппитэ.

Айсен Николаев бүгүн, алтынньы 13 күнүгэр,  оробуочай сырыытынан Абый улууһугар тиийэн, саҥа киини көрдө-иһиттэ уонна бу  киин үлэҕэ киириитэ Арктика улуустарыгар  дьоһун суолталааҕын ыйда.

«Ааспыт сылга Саха сирин Арктикатын улуустарын хаачыстыбалаах, сөбүгэр сыаналаах бородууктанан уонна табаарынан хааччыйар сыал-сорук  туруоруллубута. Саамай сүрүнэ,  атыы-логистическай киинигэр бородуукта уонна табаар  араас көрүҥэ баар буолуохтаахтарын таһынан, хотугу сир олохтоохторугар сыаналара чэпчэки буолара ситиһиллиэхтээх», – диэн Айсен Сергеевич быһаарда.

Кииҥҥэ хортуоппуй киилэтэ 74 солк., луук киилэтэ 75 солк.,  Узбекистан арбуһа, дынята киилэтэ 140 солк. атыылана тураллар. Бу иннинэ ити бородуукталар сыаналара 2-2,5 төгүл ыарахан этилэр.   Аччыгый авиация көмөтүнэн   Арктика улуустарыгар ыраах сытар нэһилиэнньэлээх пууннарга бородууктаны тиэрдиэхтэрэ. Быйыл Абый улууһун иһин уонна Аллайыаха, Муома улуустарын быһаарыахтара. Ол эбэтэр,  ыраах сытар 12 нэһилиэнньэлээх пууну хааччыйыахтара. Айсен Николаев  2024 сылга диэри Арктика бары улуустарыгар атыы-логистическай кииннэрэ аһыллан үлэлиэхтээхтэрин туһунан эттэ.

 

edersaas.ru

0
0