Айсен Николаев: «Аан дойду айылҕатын харыстыырга Саха сирэ улахан оруоллаах»
Балаҕан ыйын күнүгэр “Килиимэт уларыйыыта уонна ирбэт тоҥ” диэн III Хотугу пуорумҥа Ил Дархан Айсен Николаев кыттыыны ылла. Тыл этэригэр экология уонна килиимэт уларыйыытын боппуруостарын таарыйда.
Кини этэринэн, килиимэт уларыйыыта уонна ирбэт тоҥ чарааһыыра бүгүн баар кыһалҕа. Ордук Арктика эмсэҕэлиир. Манна Саха сирэ ураты оруоллаах. Аан дойду тыытыллыбатах айылҕатын 10%-на, Арасыыйа тыытыллыбатах айылҕатын 30%-на Саха сиригэр баар. Онон Саха сиригэр бүтүн планетарнай суолталаах экологияны харыстыыр дьайыы сүктэриллэр.
Күн бүгүн күн-дьыл, килиимэт уларыйыыта биһиги олохпутун таарыйан эрэр. Бу сайын ойуур баһаардарын туруулара өтөрүнэн буолбатах курааны кытары сибээстээх. Онон ирбэт тоҥ ирэн бардаҕына, аан дойду үрдүнэн Арктика эрэгийиэннэригэр олорор мөлүйүөнүнэн дьон олоҕор кутталынан суоһуур.
— Хоту дойду экологията олус намчы, кэбирэх. Ону харыстыыр курдук, уларыйыылар буолалларын инниттэн өтө билэр, кэтээн көрөр үлэҕэ саҥа ньымалары туһаныахтаахпыт. Бэрэсидьиэн Владимир Путин сорудаҕынан, бу сыл бүтүөр диэри ирбэт тоҥ туругун кэтиир национальнай систиэмэни үлэлэтиэхтээхпит.
Билигин Арктика Сэбиэтигэр Арассыыйа бэрэссэдээтэллиир. Ол чэрчитинэн, 2023 сылга Дьокуускайга килиимэт уларыйыытын уонна ирбэт тоҥ ириитин боппуруостарынан Аан дойдутааҕы саммит буолуоҕа. Саммит норуоттар икки ардыларынааҕы бииргэ үлэлэһиини бөҕөргөтүө, криолитозона алдьаныытын утары үлэҕэ туһааннаах дойдулары түмүөҕэ, — диэн Айсен Николаев эттэ.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru