Айсен Николаев “Амма” бурдугу үүннэрэр хаһаайыстыба хомуурга үлэтин билистэ
СӨ Ил Дархана Айсен Николаев Аммаҕа сырыытын кэмигэр “Амма” АУо маҥхааһайыгар (зерноток) сырытта уонна Покровка сэлиэнньэтигэр Ааллаах учаастакка баар хонуу биригээдэтин хомуурун үлэтин кытта билистэ.
edersaas.ru
“Амма” АУо Амма улууһугар бурдугу үүннэрэр тутаах хаһаайыстыбанан биллэр. Дириэктэр Роман Спасьев иһитиннэрбитинэн, хаһаайыстыба үүнээйини олордуу салаатыгар уонна өрөспүүбүлүкэ хаһаайыстыбаларын районированнай, хото үүнэр бурдук сиэмэтинэн хааччыйарга туорахтаах култуура валовай хомуурун оҥорон таһаарыы кээмэйин үрдэтиигэ бигэтик сайдар соругу туруорар.
“СӨ Ил Дархана Айсен Сергеевич Николаев биһиги хаһаайыстыбабытыгар 2018 сыллаахха кэлэ сылдьыбыта уонна ол сырыытын түмүгүнэн бурдук хаһаайыстыбатын өйүүргэ, сайыннарарга кэккэ быһаарыылары ылыммыта. Бурдук хомуйар комбайннары уонна тыа хаһаайыстыбатын анал тиэхиньикэлэрин СӨ Тыа хаһаайыстыбатын министиэристибэтин салаатынан судаарыстыбаннай бырагыраама суотугар ылбыппыт. Чугастааҕы сылларга туорахтаах култуура валовай хомуурун оҥорон таһаарыы кээмэйин 1600 гаттан 3500 гааҕа диэри, ону тэҥэ, туорахтаах бурдугу ыһар сири үрдэтэр былааннаахпыт”, — диэн бэлиэтээтэ.
“Амма” АУо 4,5 тыһыынча гектар бурдук бааһыналаах, 530 гектар туһалаах сирдээх, икки маҥхааһайдаах (зерноток), 16 тыраахтардаах, 8 бурдугу хомуйар комбайннаах, 7 таһаҕаһы тиэйэр массыыналаах.
Былырыын бурдук валовай хомуура 2793 тоннаҕа тэҥнэспит, былааннара 1716 тонна эбит. Маныаха биир га сиртэн 14,9 центнер үүнүүнү ылбыттар, бу 2007 сылтан бастыҥ көрдөрүү буолар.
Быйыл хаһаайыстыба 1500 гектар туорахтаах култуураны, ону тэҥэ, 406 гааҕа дьэһимиэни, 758 гааҕа эбиэһи, 336 гааҕа сэлиэһинэйи ыспыт. Туорахтаах култуура валовай хомуура 1800 тоннаҕа тэҥнэһэр, ол иһигэр 800 тонна — оҥорон таһаарыыга уонна комбикормҥа.
Айсен Николаев “Амма” хаһаайыстыба үлэтин ылынардыы сыаналаата уонна бурдугу үүннэрии ситимнээх үлэни ыыттахха туруоруллубут соругун ситиэҕэ диэн эрэнэрин эттэ.
СӨ Ил Дарханын уонна СӨ Бырабыыталыстыбатын пресс-сулууспата.
Мария ВАСИЛЬЕВА (СИА) хаартыскаҕа түһэриилэрэ.