Айсен Николаев Славян суругун-бичигин уонна култууратын күнүнэн эҕэрдэтэ
Ытыктабыллаах Саха Өрөспүүбүлүкэтин олохтоохторо!
edersaas.ru
Өрөспүүбүлүкэ салалтатын аатыттан эһигини Славян суругун-бичигин уонна култууратын күнүнэн эҕэрдэлиибин!
Бу славяннарга эрэ буолбакка, биһиги сомоҕолоһуубут славян ураты цивилизациятынан уонна дириҥ духуобунай үгэстэринэн ситимнэммитин быһыытынан, Арассыыйа итиэннэ Саха сирин бары норуоттарыгар сыһыаннаах бырааһынньык буолар. Кириллаах Мефодий төрүттээбит азбукаларынан славян норуоттарын култууралара, билигин аан дойду бары муннуктарыгар киэҥник тарҕаммыт нуучча тыла сайдыбыта. Нуучча тыла уонна култуурата Арассыыйа бары омуктарын, улуу держава гражданнарын барҕа баайбыт буолар. Славян суруга-бичигэ национальнай култууралар уһуктууларыгар олук уурбута. Үгүс омуктар суруктара-бичиктэрэ кириллицаҕа олоҕуран үөскээбитэ. Саха норуотун, бары хотугу омуктар, сурукпут-бичикпит уонна национальнай култуурабыт славян алфавитыгар олоҕуран сайдыбыта.
Нуучча тыла түөрт үйэ тухары элбэх омуктаах Саха сирин олохтоохторун сомоҕолоон кэллэ. Өрөспүүбүлүкэҕэ тыл бэлиитикэтэ сөптөөх таһымҥа ыытыллларын түмүгэр, нуучча, славян култуурата уонна төрүт олохтоох омуктар култууралара тэҥҥэ сайдаллар, бэйэ-бэйэлэрин ситэрсэллэр, хардарыта байытыһаллар.
Славян суругун-бичигин уонна култууратын күнэ – планета мөлүйүөнүнэн олохтоохторун сомоҕолуур бырааһынньык. Бу күн биир уопсай историялаах, нэһилиэстибэлээх Арассыыйа бары норуоттарын сомоҕолоһуулара бигэтин ордук чорботор.
Күндү биир дойдулаахтарым, эһиэхэ үтүөнү-кэрэни, дьолу-соргуну, доҕордоһууну, хардарыта ытыктаһыыны баҕарабын. Сахабыт сирин, Улуу Арассыыйа уйгутун уһанар таһаарыылаах үлэҕит ситиһиилэээх буолуохтун!
Саха Өрөспүүбүлүкэтин Ил Дархана Айсен Николаев.