Айсен Николаев үөрэх уонна сайыҥҥы сынньалаҥ сүрүн соруктарын бэлиэтээтэ
Өрөспүүбүлүкэ оскуоларыгар үөрэх дьылын түмүктэниитин уонна оҕо сайыҥҥы сынньалаҥын, доруобуйатын бөҕөргөтүүнү тэрийии боппуруоһа ыам ыйын 21 күнүгэр буолбут Ил Дархан Айсен Николаев мунньаҕар сүрүн тиэмэнэн буолла.
Үөрэх дьыла эрдэ түмүктэммит үгүс эрэгийиэннэригэр оҕолор таһырдьа тахсыылара элбээн, оскуола саастаах оҕолор ортолоругар коронавируһунан ыалдьыы эмискэ үрдээбитин бэлиэтээтилэр. “Итинник түгэн бэлиэтэммэтин туһугар, биһиги үөрэх дьылын түмүктэниитин боппуруоһугар дьоһуннаахтык сыһыаннаһыахтаахпыт. Доруобуйаны чэбдигирдэр сайыҥҥы лааҕырдар аһыллыылара көһөрүллүбүтүнэн сибээстээн, оҕо дьиэтигэр бэйэтэ-бэйэтигэр хаалбатын туһугар, араас дистанционнай ньыманан хабарбыт ирдэнэр. Саха сирэ Татарстан Өрөспүүбүлүкэтин, Калиниград уонна Калуга уобаластарын, Москваны уонна Подмосковьены сэргэ дистанцоннай үөрэҕи тэрийиигэ инники кэккэҕэ сылдьар. Онон тустаах боппуруоһу быһаарарга туох даҕаны кыһалҕа күөрэйиэ суохтаах”, — диэн Ил Дархан бэлиэтээтэ.
СӨ Үөрэҕин уонна наукатын министиэристибэтин чахчытынан, быйыл 11-с кылааһы 7948 оҕо бүтэрэр, итинтэн 6364 оҕо үрдүк үөрэххэ туттарсар санаалаах. Күн бүгүн биир кэлим эксээмэн (ЕГЭ) болдьоҕо быһаарылла илик. “Ол эрээри, Роспотребнадзор уонна Рособрнадзор сүбэтигэр олоҕуран, оҕолор туох баар социальнай дистанцирования ирдэбилин тутуһан туттарыахтара. Онтон эксээмэн ыытыллар сирдэрэ санитарнай-эпидемиологическай ирдэбилгэ эппиэттиэхтээхтэр. Үрдүк үөрэхтэр тутар хамыыһыйалара эмиэ дистанционнай ньыманан барыаҕа”, — диэн миниистир эбээһинэһин толорооччу Михаил Сивцев кэпсээтэ.
Ону таһынан, быйыл сайыҥҥы сынньалаҥынан үөрэнээччи 50 %-тан итэҕэһэ суох оҕону хабар былааннаахтарын иһитиннэрдэ. Бу 72 тыһыынчаттан тахса үөрэнээччи буолар. Доруобуйаны бөҕөргөтөр сайыҥҥы сынньалаҥ хампаанньатын бастакы симиэнэтэ, ыраах нэһилиэктэртэн ураты, дистанционнай ньыманан тэриллиэҕэ.
Оскуоланы бүтэрээччилэри, төрөппүттэри долгутар өссө биир боппуруоһунан “Бүтэһик чуорааны” уонна оскуоланы бүтэрэр баалы тэрийии буолар. Айсен Николаев Саха сирэ түөрт бөлөххө араарыллыбытын, хас биирдии бөлөххө эпидемиологическай балаһыанньаттан көрөн, туһааннаах министиэристибэни кытта сүбэлэһэн, улуус баһылыктара үөрэх управлениетын кытта сөптөөх быһаарыыны ылыахтаахтарын бэлиэтээтэ. Холобур, коронавирус бэлиэтэммэтэх хотугу уонна Арктика улуустарыгар бары санитарнай-эпидемиологическай балаһыанньаны тутуһан, “Бүтэһик чуораан” уонна оскуоланы бүтэрэр баал “очно” барыахтарын сөп.
“Биһиэхэ оҕоҕо, доруобуйатыгар куттал суоһаабата инники соругунун буолар. Онон бары оскуолаларга, биир кэлим эксээмэн (ЕГЭ) ыытыллар пууннарыгар, оскуола таһынааҕы уонна оҕо доруобуйатын бөҕөргөтөр лааҕырдарга бары санитарнай-эпидемиологическай нуорманы тутуһууну бигэтик хонтуруоллуур ирдэнэр”, — диэн мунньах түмүгэр Айсен Николаев эттэ.
СӨ Ил Дарханын уонна Бырабыыталыстыбатын пресс-сулууспата.
Хаартыска: Мария ВАСИЛЬЕВА (СИА).