Бүгүҥҥү брифиҥҥэ Ил Дархан Айсен Николаев Дьокуускай куоракка халаан улахан куттала суоҕун бэлиэтээтэ.
edersaas.ru
– Муус харыыта дэлби тэптэриллэн, Табаҕаҕа уонна Хаҥаласка уу таһыма биллэрдик түстэ. Жатай уонна Хаҥалас икки ардыгар боротуохаҕа бытархай муус мунньуллан үөскэппит дьоҕус харыыта хаалла. Уу таһыма түһэ турар, онон куттал суоһаабат буолла, – диэтэ Ил Дархан уонна билигин сүрүн кэтиир-маныыр үлэ Нам улууһугар ыытылларын эттэ. – Көмүөл Граф биэрэгэр тиийиэр диэри улахан куттал суоһаабатыгар эрэнэбит. Суһал бөлөхтөр Намҥа быраҕылыннылар, онтон салгыы барыахтара. Муус түргэнник устарынан, чугастааҕы күннэргэ Алдан өрүс Өлүөнэҕэ түһүөҕэ. Билигин болҕомто Уус Алдан уонна Кэбээйи улуустарын нэһилиэнньэлээх пууннарыгар ууруллар.
Айсен Николаев быһыы-майгы хонтуруолга тутулларын, билиҥҥитэ халаантан улахан алдьаныы-кээһэнии суоҕун итиэннэ нэһилиэнньэлээх пууннарга куттал суоһаабатын эттэ.
— Киин куоракка ууга барбыт ыаллар тиэргэннэрэ ууттан босхолонон эрэллэр. Эмсэҕэлээбит ууну аһардар тутуулар уонна даамбалар хоромньуну ааҕыы кэнниттэн, чөллөрүгэр түһэриллиэхтэрэ, – диэтэ диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru