Бүгүн Ил Дархан Айсен Николаев социальнай ситимнэринэн быһа сибээһинэн тахсар кэмигэр көрөөччүллэр Аммаҕа мас кэрдиитин боппуруоһун эмиэ ыйыталастылар.
ederasaas.ru
“Ааспыттааҕы быһа сибээс кэмигэр эмиэ ыйыппыттара, быһаарсыах буолбутум. Балаһыанньа икки өрүттээх. Биир курдук өрөспүүбүлүкэ ойуура 255 мөлүйүөн гектар сиргэ үүнэр. 100-тэн тахсалыы сыл үүммүт мастар кэрдиллиэхтээхтэр. Оннук гымматахха бу мас куурар-хатар, салгыы куруҥ буолар, онтон лааҥкыга кубулуйар. Ол түмүгэр баһаар тахсар.
Билигин сэбиэскэй кэм курдук маһы бырамыысыланнай сыалга кэрдибэттэр. Биирдиилээн дьон бэйэлэригэр, кыра тэрилтэлэр кэрдэллэр. Ол түмүгэр хастыы даҕаны сыл турбут мастар куура хаталлар. Чаҕылҕаҥҥа, ханнык эмэ кыра баһаарга бастакынан умайан барар. Тайҕа барыта уокка былдьанар. Ойуур хаһаайыстыбатын үгүс исписэлиистэрэ итини бэлиэтииллэр. Онон маһы бары ирдэбили, нуорманы тутуһан кэрдиллиэхтээх.
Иккис курдук, ыытыллыбыт аукцион, биллэн турар, үгүс боппуруоһу көтөҕөр. Итиннэ барыта эриэ-дэхси буолбатах. Бырайыак эмиэ үгүс боппуруоһу үөскэтэр, үгүс бастара (разделлара) суохтар, докумуоннара кырааматынайа суохтук оҥоһуллубуттар, булгуччу ыытыллыахтаах экспэртиисэ саҥа буолла. Маныаха исписэлиистэр “отрицательнай” түмүгү биэрдилэр”, — диэн иһитиннэрдэ.
Маны таһынан, ИДьМ уонна Айылҕа харыстабылын борокуратуурата бэрэбиэркэни ыыталларын эттэ. Тустаах кыһалҕа өрөспүүбүлүкэ таһымнаммытын ыйда. Силиэстийэ бүтүөр диэри туох баар аукциону тохтоппутун, туох даҕаны үлэни ыытымаҥ диэн эппитин иһитиннэрдэ. Онон Аммаҕа маһы кэрдии тохтуур. Ону кытта, Ойуур хаһаайыстыбатын департамена Аммаҕа эрэ буолбакка, Саха сирин территориятыгар барытыгар үлэлэһиэхтээҕин, манна барытыгар уопсастыбаннас кыттыахтааҕын, ырытыһыахтааҕын бэлиэтээтэ.
“Итиэннэ, биллэн турар, манна олохтоох дьоҕус, орто биисинэс кыттыахтаах. Ыаллыы олорор эрэгийиэммитинээҕэр биһиги урбаанньыттарбыт мөлтөхтүк дьарыктаныахтара дии санаабаппын”, — диэн эттэ.
Людмила ПОПОВА, edersaas.ru