СӨ Ил Дархана Айсен Николаев муус устар 18 күнүнээҕи туругунан, эпидемиологиескай балаһыанньа бэрдэ суох, балачча тыҥааһыннаах диэн брифинг кэмигэр иһитиннэрдэ.
“Алдан куорат территориятыгар харантыын биллэрбиппит сөптөөх быһыы буолара бигэргэннэ. Тоҕо диэтэххэ, Алдан куорат ырыынагар тахсыбыт ыарыы күөдьүйүүтүн боҕустубут. Сүүстэн тахса киһи обсерваторга сытар. Ити сөптөөх дьаһал эбит. Күн ахсын ыалдьыбыт дьон анаалыһа бигэргэнэр. Ааспыт сууккаҕа обсерваторга киирбит дьонтон, аҥаардас Алдаҥҥа 26 киһи ыалдьыбыта билиннэ. Улахан аҥаардара ырыынак үлэһиттэрэ уонна кинилэр дьиэ кэргэттэрэ. Алдан атын олохтоохторо туттарбыт анаалыстара ыарыы суоҕун көрдөрдө.
Дьокуускай куоракка кэлиҥҥи сууккаҕа 4 киһи эбии ыалдьыбыта билиннэ. Бары кэлии дьон. Барыларын аоэропорка бэрэбиэркэлээбиттэрэ. Билигин Роспотребнадзор кинилэри кытта биир рейсэнэн көтөн кэлбит дьонтон анаалыс ылар.
Миринэйгэ хас даҕаны киһи сэбиргэхтээн уонна коронавирус курдук бэлиэлэрдээх буолан, ыарыыга сабаҕалана сырыттылар эрээри, хата, анаалыстара ыалдьыбаттарын бигэргэттэ. Онон, Миринэйгэ 1 бигэргэммит ыарыһах баар. Кини Подмосковьеҕа эмтэнэн кэлбитэ.
Атын оройуоннарга уларыйыы суох. Чайыҥдатааҕы ньиэп-гаас хостуур сиргэ салгыы үлэлэһэбит. Манна харантыын биллэриллибитэ”, — диэн эттэ.
Онон, өрөспүүбүлүкэ үрдүнэн, ааспыт суукка устата 30 киһи эбии ыалдьыбыт. Инньэ гынан, Саха сиригэр, уопсайа, 77 киһиэхэ коронавирус анаалыһа бигэргэммититтэн, 16 киһи үтүөрдэ, 61 ыарыһах балыыһаҕа сытар.
Людмила ПОПОВА, edersaas.ru