Бэҕэһээ Ил Дархан Айсен Николаев социальнай ситимнэринэн быһа сибээскэ тахсан, нэһилиэнньэни долгутар ыйытыыларга хоруйдаата. Саха сиригэр, ханна даҕаны буоларыныы, бу нэдиэлэҕэ коронавирус балаһыанньата уустугурбутун эттэ.
Бэҕэһээҥҥи туругунан, Саха сиригэр, уопсайа, 47 коронавирус түгэнэ бигэргэммит. Итинтэн 16 киһи үтүөрэн дьиэтигэр тахсыбыт, балыыһаҕа 31 киһи сытар.
“Алдан түгэнэ кутталлаах. Онно 14 киһи ыарыйда, Ленскэйгэ – 5, Миринэйгэ – 1, Бүлүүгэ – 1, Дьокуускайга – 10. Өскөтүн, эрдэ биирдиилээн түгэннэргэ ыарыы тастан киирэр эбит буоллаҕына, билигин, хомойуох иһин, бэйэ-бэйэлэриттэн сысталлар. Холобур, Алдаҥҥа 3 ыалдьыбыт киһи кэлбит, бүгүн номнуо 14 киһиэхэ анаалыһа бигэргэннэ. Өссө эбиллиэҕэ диэн сабаҕалыыбыт. Алдаҥҥа харантыын биллэриллибитэ. Ыалдьыбыт дьону кытта хантаахтаах уонна алтыспыт дьоннорун барыларын бэрэбиэркэлииллэр. Бары изоляцияҕа олороллор”, — диэн Ил Дархан иһитиннэрдэ.
Ону тэҥэ, Чайыҥдатааҕы ньиэп-гаас хостуур сиргэ хас даҕаны киһи ыалдьан, карантин биллэриллибитэ. Киирии-тахсыы бобуллан турар. Кэккэ ыалдьыбыт уонна ыалдьыбыта сабаҕаланар дьону Газпром анал рейсинэн Ноябрьскайга илдьибиттэр. Анал биригээдэ кэлэн бэрэбиэркэ ыытыллара күүтүллэр диэн иһитиннэрдэ. Дойду бырабыыталыстыбата, Ыксаллаах быһыы-майгы уонна суһал штаб бары бииргэ үлэлиир буолан, хонтуруолланар, мантан салгыы тарҕамматын тутуһугар үлэни ыыталлар.
“Бүгүҥҥү биһиги сорукпут – Алданы хонтуруолга тутуу уонна Миринэйгэ салгыы тарҕамматын ситиһии. Миринэйгэ биир киһи ыалдьыбыта бэлиэтэнэр. Подмосковьеҕа эмтэнэн кэлбит киһи. Ону тэҥэ, хас даҕаны внебольничнай пневмониялаах киһи баара биллэр. Анаалыс түмүгүн кэтэһэбит. Дьокуускайга балаһыанньа уустук. Тастан кэлбит курдук көрдөрө сатыыллар эрээри, билигин номнуо куоракка киһиттэн киһиэхэ бэриллэр түгэнэ кутталлаах”, — диэн бигэргэтэн эттэ. Кэлиҥҥи ыалдьыбыт дьон Дьокуускайга сыстыбаттара биллибит. Онон дьон дьиэҕэ олороруттан ыарыы салҕыы тарҕанара-тарҕаммата улахан тутулуктаах диэн ыйда.
Людмила ПОПОВА, edersaas.ru