Муус устар 7 күнүгэр Ил Дархан Айсен Николаев дойду бэрэсидьиэнэ Владимир Путин эрэгийэн баһылыктарын кытта коронавируһу утары ыытыллар үлэ туһунан мунньаҕар видео-кэмпириэнсийэ нөҥүө кытынна.
Владимир Путин бу ыксаллаах кэмҥэ доруобуйа харыстабыла, бигэ туруктах экэниэмикэ, нэһилиэнньэ дохуоттаах буолуута бастакы миэстэҕэ туралларын бэлиэтээтэ. Мэдиссинискэй тэрилтэлэр бэлэмнээх, толору хааччыллыылаах буолууларын тэрийии бары эрэгийиэн салалтатын биир сүрүн соруга диэн Владимир Путин эттэ.
Инфекционнай балыыһаларга эбии куойка-миэстэ тэриллиитигэр дойду бүддьүөтүттэн 33 миллиард солкуобай көрүлүннэ. Бу күннэргэ эбии мэдиссинискэй тиэхиньикэ, суһал көмө массыыналара эрэгийиэннэргэ тиийэрэ былааннанар. Манна 13 миллиард көрүллүбүт.
Өрөспүүбүлүкэҕэ коронавируһу утары үлэ ыстааба суукканы төгүрүччү үлэлиир. “Ыраахтан” 31 тыһыынча киһи үлэлии олорор, 144 325 үөрэнээччи дистанционнай үөрэххэ көстө.
Билигин өрөспүүбүлүкэ салалтатын бары кыаҕа коронавирус тарҕаныытын тохтотор үлэҕэ туһаайылынна.
Нюргуйаана Иванова, “Саха сирэ” хаһыат, edersaas.ru
Хаартыска — интэриниэттэн.