Айсен Николаев коронавирус тарҕаныытын таһаарбат туһугар эбии миэрэлэри олохтоото
Арассыыйа Федерациятын Кылаабынай судаарыстыбаннай санитарнай бырааһын ирдэбиллэригэр олоҕуран, Саха сирин баһылыга Айсен Николаев саҥа коронавирус инфекцията тарҕаныытын утары эбии миэрэлэри олохтоото.
edersaas.ru
Уонна муус устар 1 күнүгэр “Саха Өрөспүбүлүкэтин сиригэр-уотугар үрдүк бэлэмнээх буолуу эрэсиимин киллэрэр уонна саҥа коронавирус инфекциятын (COVID-19) тарҕаныытын утары миэрэлэр тустарынан” ыйааҕар туһааннаах уларыйыылары киллэрдэ.
Уларыйыыларга олоҕуран, 2020 сыл муус устар 1 күнүттэн Дьокуускай куорат аэропуордугар тас дойдулартан кэлбит дьон кэлбит күннэриттэн булгуччу 14 халандаарынай күн устата обсерваторга булгуччу киириэхтээхтэр.
Өрөспүүбүлүкэ Доруобуйа харыстабылын министиэристибэтигэр тас дойдуттан кэлбит дьону изоляция миэстэтигэр диэри тиэйэн таһаарыыны хааччыйарыгар, маныаха коронавирус саҥа инфекцията сыстыытын таһаарбат туһугар сорудахтаата.
Ону тэҥэ саҥа ыйааҕынан Ил Дархан бу инфекцияҕа булгуччулаах бэрээдэгинэн лабораторнай чинчийии ыытыллыахтаах дьон кэрискэтин чопчулаата.
Бу кэрискэҕэ киллэрилиннилэр: өрөспүүбүлүкэ сиригэр-уотугар дьаҥ (респираторнай ыарыы) сибикилээх киирбит, саҥа коронавирус инфекциялаах дьону кытта хантаактаспыт, “сэбиргэхтэппит (“внебольничная пневмония”) дьон, 65 аҕа саастаах респираторнай ыарыынан ыалдьан мэдиссиинэ көмөтүгэр наадыйбыт дьон.
COVID-19 анаалыстары нэдиэлэҕэ биирдэ үлэлиир миэстэлэригэр бу саҥа вируска сыстар куталлаах мэдиссиинэ үлэһиттэрэ биэриэхтэрэ, оттон итинник сибики билиннэҕинэ, тутатына туттарыахтаахтар.
Маны сэргэ респираторнай ыарыы сибикилэрэ билиннилэр даҕаны сылы эргиччи олордор тэрилтэлэргэ олорооччулар – сабыылаах көрүҥнээх анал үөрэх-иитэр тэрилтэлэригэр, кадетскай куорпустарга, интэринээт-дьиэлэргэ, Накаастабылы толотторор Федеральнай сулууспа тиһиктэригэр олорор дьон уонна маннык тэрилтэлэр персоналлара анаалыс туттарыахтаахтар.
СӨ Ил Дарханын 2020 сыл кулун тутар 17 күнүнээҕи “Саха Өрөспүбүлүкэтин сиригэр-уотугар үрдүк бэлэмнээх буолуу эрэсиимин киллэрэр уонна саҥа коронавирус инфекциятын (COVID-19) тарҕаныытын утары миэрэлэр тустарынан” 1055 №-дээх Ыйааҕын манна киирэн көрүҥ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова, “Саха сирэ” хаһыат.
Хаартыска: тустаах саайтан