Бүгүн, кулун тутар 30 күнүгэр, 11 чааска Саха сирин баһылыга Айсен Николаев эрэгийиэҥҥэ коронавирус балаһыанньатын туһунан брифинг ыытта.
«Бүгүҥҥү туругунан, Саха сиригэр коронавируһунан 15 киһи ыалдьыбыт диэн. Өссө биир анаалыһы Новосибирскайдааҕы «Вектор» лабораторияҕа бигэргэтиигэ ыыппыппыт. Бу анаалыһы Дьокуускайга пуорка баар 2-с №-дээх балыыһа үлэһититтэн ылбыттара. Онон, бу балыыһа сабыллыбыта, ыарыһахтартан уонна үлэһиттэртэн анаалыс ылыллыбыта.
Бу ааспыт өрөбүллэргэ Саха сиринээҕи лабораториялар 752 анаалыһы оҥордулар, барыта «отрицательнайдар», дьаҥ суох диэн көрдөрдө. Роспотребнадзор барыллаан ыалдьыбыт киһи хантаактаспыт дьонун кытта үлэлэһэр.
Билигин эмтэнэ сылдьар ыарыһахтар туруктара этэҥҥэ, бу нэдиэлэҕэ ким эмит үтүөрүө диэн эрэнэбит.
Владимир Путин дойду үрдүнэн биллэрбит өрөбүл нэдиэлэтэ саҕаланна. Хомойуох иһин, уулуссаҕа сылдьар дьон син биир элбэх. Онон, дьиэҕитигэр олоруҥ диэн өссө биирдэ этэбин.
Саха сиригэр бүтэһик икки нэдиэлэ иһигэр тас дойдулартан 2012 киһи көтөн кэллэ. Бу дьон бэйэлэрин хааччахтаан дьиэҕэ олоруохтаахтар, эппиэтинэстээх буолуҥ диэн ыҥырабын. Москваттан, Санкт-Петербургтан көтөн кэлбит дьон эмиэ олороргутугар, ыарыы сибикитин биллигит да биллэриҥ.
Оттон Кытайтан иһэр мэдиссиинискэй мааскалар бу нэдиэлэ бүтүүтэ кэлэллэр ини диэн эрэнэбит», — диир Ил Дархан.
edersaas.ru