Ил Дархан э.т. Айсен Николаев бүгүн Нам улууһугар үлэлиир. Ойуур баһаарын умулларыыга Ыксаллаах быһыы-майгы хамыыһыйатын мунньах ыытта.
— Россия үрдүнэн ойуур баһаарыгар биһиэхэ уустук балаһыанньа үөскээбитэ. Ол эрээри билигин балаһыанньа тупсан эрэр. Холобур, Нам улууһугар нэдиэлэ анараа өттүгэр улахан баһаар турбут буоллаҕына, Ойуур харыстабылын, Ыксаллаах быһыы-майгы сулууспатын, бэйэ баҕатынан ойуур баһаарыгар үлэлиир дьон көмөтүнэн кыччатылынна, салгыы умулларыахтара диэн эрэнэбин. Билиҥҥи туругунан, Горнай улууһугар уустук. Манна Читаттан эбии биригээдэ кэлбитэ. Онон бу күннэргэ балаһыанньа тупсуоҕа. Бүлүү бөлөх улуустарга баһаары умулларыыга сөптөөх үлэ ыытыллан, билигин уот намыраата. Уопсай ылан көрдөххө, өрөспүүбүлүкэҕэ билигин балаһыанньа лаппа тубуста. Куйаас күннэр, ойуур баһаарын улахана ааста. Хотугу улуустарга Эдьигээн, Абый улуустарыгар куттал баар. Ол эрээри от ыйын курдук буолуо суоҕа. Баһаартан сэрэхтээх буолуохха наада. Ойуур баһаарын 30% киһи буруйуттан таҕыста, — диэн иһитиннэрэр Айсен Николаев.
Аграфена КУЗЬМИНА, edersaas.ru