Айсен Николаев өрөспүүбүлүкэҕэ буола турар быһыыны-майгыны билиһиннэрдэ (АУДИО)
Кулун тутар 18 күнүгэр Ил Дархан Айсен Николаев суруналыыстары кытта көрсөн өрөспүүбүлүкэҕэ быһыы-майгы хайдаҕын билиһиннэрдэ.
«Бэҕэһээҥҥиттэн ыла коронавирус анаалыстарын Роспотребнадзор лабораториятыгар эрэ буолбакка, эбии лаборатория Доруобуйа харыстабылын министиэристибэтин иһинэн арыллыаҕа диэн сорудах барбыта. Быһа нүөмэрдэринэн эрийэн, омук дойдутутан, Москваттан кэлбит устудьуоннар ханна анаалыс туттаралларын эрийэн ыйытыҥ.
Анаалыһы ылар тестэр биһиэхэ Москваттан кэлэллэр. Онон, наһаа элбэх буолбатах. Бастакы уочарат манан коронавирустаабыт дьону кытта алтыспыт дьоҥҥо тутталлар. Бу — ыарыы баарын-суоҕун түргэнник быһараар ньыма.
Туох баар тэрилтэ салайааччылара бэҕэһээ тахсыбыт ыйааҕы үөрэтэллэригэр баҕарабын. Бүгүҥҥү күнү ылан көрдөххө, сорох улуустар ону тутуспаттар эбит, ханна эрэ тэрээһиннэр ыытыллаллар эбит. Ыйаах өрөспүүбүлүкэ бары улууһугар сыһыаннаах.
Салайааччылар кыах баар буоллаҕына үлэһиттэргитин тастан үлэлэтиҥ. Мин маннык сорудаҕы судаарыстыбаннай, муниципальнай уорганнарга биэрбитим. Федеральнай уорганнарга бу эмиэ киирэн эрэр. Үгүс оҥорон таһаарыы тэрилтэлэрэ эмиэ тастан үлэҕэ көстүлэр. Маныаха үлэһиттэр хамнастара оннунан хаалар.
Самоизоляцияламмыт дьон балыыһаҕа тиийэн, уочаракка олорумаҥ. «Горячай линияҕа» эрийиҥ, миэстэтиттэн анаалыстары ылыахтара. Бэйэҕит эмтэнэ, балыыһаҕа барымаҥ.
Бүгүҥҥүттэн өрөспүүбүлүкэ оскуолалара сабылыннылар, дистанционнай үөрэххэ көстүлэр. Оҕо саадтара үлэлииллэр, манна сууйуу-сотуу, дезинфекция үлэтэ күүскэ барар.
Бу ылыныллар миэрэлэр өрөспүүбүлүкэҕэ коронавирус инфекцията тарҕамматыгар туһаныллыахтара диэн эрэнэбин», — диир Ил Дархан.
Редакцияттан: СӨ Роспотребнадзор управлениетын «быһа сибээһин» нүөмэрэ: 8-800-550-21-24;
СӨ Доруобуйа харыстабылын министиэристибэтин «быһа сибээһин» нүөмэрэ: 8-800-100-14-03
Айтана Аммосова, edersaas.ru