Айсен Николаев: «Бырамыысыланнас, экэниэмикэ салааларыгар үлэһиттэр элбииллэрин туһугар үлэлиэхтээхпит»
Бэҕэһээ өрөспүүбүлүкэ Ил Дархана Айсен Николаев Өлүөнэ муостатын тутуу, үөрэх уонна тыа хаһаайыстыбатын туһунан “Саха” НКИХ ханаалыгар “Ил Дарханныын кэпсэтии” биэриигэ кэпсээбитэ. Бүгүн ол кэпсэтииттэн быһа тардан суруйабыт.
— Айсен Сергеевич, олунньу 6 күнүгэр Москваҕа Госсэбиэт мунньаҕар кыттан кэллиҥ. Манна дойдуга үөрэх сайдыытын боппуруоһа көрүлүннэ. Биһиэхэ бу хайысханан туох үлэ-хамнас ыытылларый?
— Госсэбиэт иннинэ икки күн Подмосковьеҕа олорон үлэлээбиппит, этиилэрбитин бэлэмнээбиппит. Онно губернатордар, учуонайдар, үрдүк үөрэх тэрилтэлэрин ректордара кыттыбыттара. Госсэбиэт сүрүн сыала-соруга — дойдуга үрдүк, орто анал үөрэҕи, наука сайдыытын үөһээ таһымҥа таһаарыы. Үөрэх кыһалара олох сайдыытыгар төһө эппиэттиилэрий, каадырдары төһө бэлэмнииллэрий? Маныаха эрэгийиэннэр оруоллара үрдүк буолуохтаах. Оттон эрэгийиэннэр оруолларын хайдах улаатыннарыахтарай? Билигин бу өттүгэр боломуочуйабыт суох. Биһиги университеппытыгар харчы биэрээри гыннахпытына,үгүс айдаанынан, эрийэн-буруйан, атын пуондалар нөҥүө биэрэрбит олох сыыһа. Эрэгийиэннэр оруоллара наука, үөрэх өттүгэр тосту улаатыахтаах. Үгүс субъектар салайааччылара наука уонна үрдүк үөрэх салайыытынан дьарыктаныахтаахтар. Кинилэр бырагыраамаларынан аҥаардас тус сыаллаах үөрэххэ ылыыга харчы биэрэн эрэ кыттыа суохтаахтар. Араас попечительскай сэбиэттэргэ киириэхтээхтэр. Эрэгийиэннэр ити үлэҕэ барытыгар кыттыахтаахтар. Бэрэсидьиэн бүддьүөт миэстэлэрэ университеттарга эбиллиэхтээхтэр диэтэ. Университет үөрэҕэ төлөбүрдээх, ону үгүс дьон кыаммат. Ол иһин үөрэнэр кыахтаах да оҕолор үөрэммэккэ хаалаллар. Орто анал идэҕэ үөрэтиигэ туох үчүгэй этиилэр иһилиннилэр диэтэххэ, идэтийбит үөрэхтээһин сайдыахтаах, бырамыысыланнас, экэниэмикэ салааларыгар үлэһиттэр элбииллэрин туһугар үлэлиэхтээхпит.
Бэлэмнээтэ Женни Стрюкова.