Айсен Николаев киһи олороругар анаммат тутуулартан дьону көһөрүүгэ этиилэри киллэрдэ

Тохсунньу 28 күнүгэр Алексей Кудрин видео-кэмпириэнсийэ көрүҥүнэн Арассыыйа Счетнай палаататын кэллиэгийэтин мунньаҕын Сибиир уонна Уһук Илин оройуоннарын бырамыысыланнай баһылааһын кэмигэр оҥоһуллубут киһи олороругар сөбө суох дьиэлэртэн көһөрүүгэ ылыллар миэрэлэри ылыныы түмүктэрин көрүүгэ анаата.

Бу боппуруоска РФ Счетнай палаататын аудитора Светлана Орлова уонна РФ ОДьКХ уонна тутууга миниистирэ Владимир Якушев тыл эттилэр.

Бу үлэ РФ Бэрэсидьиэнин Владимир Путин 2019 сыл сэтинньи 26 күнүнээҕи сорудаҕынан ыытыллар. Сибиири уонна Уһук Илини бырамыысыланнас баһылааһынын кэмигэр оҥоһуллубут дьиэлэртэн дьону көһөрүү тэрээһинин РФ тутууга министиэристибэтэ 2020-2022 сылларга олоххо киллэрэр баҕалаах.

Мунньахха Саха сирин баһылыга Айсен Николаев иһитиннэрии оҥордо. Кини РФ Счетнай палататыгар сытыы боппуруоһу көрөллөрүн иһин махтанна. Саха сиригэр эрэгийиэни бырамыысыланнас баһылааһынын кэмигэр киһи олороругар анамматах тутуулар суут уурааҕынан уонна олохтоох салайыныы уорганнарынан киһи олороругар анаммыттарынан билиниллибиттэрэ. Ити эрээри РФ Бырабыыталыстыбатынан маннык тутуулартан гражданнары көһөрүүгэ федеральнай бүддьүөттэн ороскуоттары кыттыгас үбүлээһиҥҥэ субсидиялары биэриигэ уонна тыырыыга быраабылалартан “киһи олорор” диэн тылы суох гынар уураах бырайыагын бэлэмнээбитэ. Докумуон ылыннылыннаҕына, Саха сиригэр 456 киһи олорор 181 дьиэтэ (помещение) көһөрүү бырагырааматыгар киириэ суоҕа.

“Оччотугар дьиҥнээҕинэн киһи олорор кыаҕа суох эрээри, манныгынан суутунан билиниллибит, билигин манна дьон регистрацияламмыт бары тутууларбыт, бу тэрээһиннэр киритиэрийдэригэр киирбэттэр. Манан сибээстээн эрэгийиэн баһылыга бу РФ уурааҕар өрөспүүбүлүкэ маннык тутуулара дьон олороругар табыгаһа суох дьиэлэртэн көһөрүүгэ тэрээһиннэргэ хапсалларын курдук, “киһи олорор” уонна “киһи олорбот” тыллары киллэрэллэригэр эттэ.

Ону сэргэ өрөспүүбүлүкэ баһылыга “1991 сыл ахсынньы 25 күнүгэр диэри олорбут эрэ гражданнар уонна кинилэр дьиэ кэргэттэрэ” диэн киритиэрийи олус быһа бааччы диэн бэлиэтээтэ.

Маны сэргэ Айсен Николаев дойдуга саахалланар дьиэттэн дьону көһөрүү бырагырааматыгар киирсибэт икки кыбартыыралаах блокированнай дьиэлэр элбэхтэрин иһитиннэрдэ. Оттон маннык дьиэлэр өрөспүүбүлүкэҕэ – сүүһүнэн. “Бүгүн дьоҥҥо аттыларыгар турар түөрт кыбартыыралаах дьиэ көтүрүллэрин, оттон кинилэр мөлтөх туруктаах икки кыбартыыралаахтара ханнык да бырагыраамаҕа киирсибэтин быһаарар уустук!”, — диэтэ Ил Дархан.

Ол иһин өрөспүүбүлүкэҕэ муниципалитеттары кытта баар дьиэни-уоту инвентаризациялааһыны бииргэ ыытыы саҕаланан, түмүктэнэн эрэр.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.
Женни Стрюкова бэлэмнээтэ.