Ил Дархан Айсен Николаев Instagram социальнай ситимҥэ устудьуоннар күннэринэн эҕэрдэлээтэ.
«Устудьуоннуур кэм — олох саамай кэрэ кэмэ! Устудьуоннуу сылдьан идэҕэр маҥнайгы хардыылары оҥороҕун, тэтимнээхтик үөрэнэҕин, долгутуулаах зачеттарга уонна экзаменнарга бэлэмнэнэҕин. Ломоносов аатынан Москватааҕы судаарыстыбаннай үнүбэрситиэт физика салаатын устудьуона буолбуппуттан хайдахтаах курдук үөрбүппүт билигин да умнубаппын», — диэн Ил Дархан суруйда.
Устудьуоннуур сылларыгар МГУ Воробьевскай хайаларыгар турар сүрүн куорпуһугар олорбутун уонна сарсыарда мунньахха баран иһэн таарыйан ааспытын эттэ.
«Биһиги манна биэс буолан биир хоско, түөрт буолан биир ваннаҕа, үс буолан биир тэриэлкэҕэ буолан олорбуппут. «Интернет» уонна «Google» диэн тыллары билбэт этибит, библиотекаҕа сылдьааччыбыт. 90-с сылларга бэйэтин үөрүйэҕэ суох тутулунан сөхтөрөр элбэх саҥа сүүрээн баар буолбута. «Феррохромовай кассеталар», «Сникерс», маҥнайгы көмпүүтэрдэр, Сэбиэскэй Сойуус эстэн Россия Федерацията олохтоммут кэмнэрэ этэ», — диэн бэлиэтээтэ.
Айсен Николаев устудьуоннарга үөрэх чэпчэкитик бэриллэригэр, экзаменнар түргэнник туттарыллалларыгар уонна бэйэни сайыннарыыга элбэх бириэмэ ордоругар саҥа быһарыылары көрдүүллэригэр баҕарда.
«Устудьуоннуур сылларгы эһиэхэ саамай чаҕылхай уонна үөрүүлээх түгэннэри бэлэхтээтин! Устудьуоннар күннэринэн эҕэрдэлиибин!», — диэн баҕа санаатын суруйда.